Densaýlyq saqtaýdy damytý respýblikalyq ortalyǵynyń bas direktory Qanat Tósekbaev QR Prezidenti Qasym-Jomart Toqaevtyń «Egemen Qazaqstan» gazetinde jariialanǵan «Táýelsizdik bárinen qymbat» atty maqalasyna pikir bildirdi, dep habarlaidy QazAqparat.
«Til – eń asyl qundylyq. Tildi órkendetý - barshanyń isi. Til – tek qarym-qatynas quraly emes, ultymyzdyń biik tuǵyry. Bul rette bizdiń memleketimizdiń tilge degen janashyrlyǵy basym. Memleket basshysynyń búgingi «Táýelsizdik bárinen qymbat» atty jaryq kórgen maqalasyndaǵy basym baǵyttarynyń biri – memlekettik tildi jan-jaqty damytýdy basty nazarda ustaý, qoǵamda qazaq tiliniń memlekettik dárejesin nyǵaitý elimizdiń saiasatynyń basty basymdyǵy bolyp qala beredi. Qoǵamda, memlekettik qoldaý múmkindigi joǵary salalarda, memlekettik mekeme qyzmetkerleri arasynda qazaq tiliniń qoldanys aiasy edáýir keńeiip kele jatyr, jumys berýshi tarapynyń basty nazarynda – qazaq tilin jetik meńgerýi dep aitýǵa tolyq negiz bar», - deidi Q. Tósekbaev.
Spiker qazirgi qoǵamda jastardyń belsendiligi joǵary ekenin, jastarǵa basa nazar aýdarý arqyly til saiasatyn júrgizý mol jemis beretinin atap ótti.
Sonymen birge, Q. Tósekbaev basshylyq qyzmet, memlekettik qyzmetshilerge, depýtattyqqa úmitkerlerdi memlekettik tildi jetik meńgerýdi mindetteýdi usyndy.
«Elimiz táýelsizdik alǵaly beri tól tilimiz memlekettik mártebege ie bolyp, qoldanys órisi keńeidi. Qazirgi tańda óner, ádebiet, mádeniet, baspasóz, radio, teledidarymyz 90-jyldarǵa qaraǵanda áldeqaida «qazaqsha sairap tur» desek bolady. Bul bizdiń memlekettik tilimizdiń mártebesiniń asqaqtaǵany. Bul, osy ýaqytqa deiin barlyq yqtimal jaǵdaidy jete baǵamdai otyryp júrgizilgen memlekettik til saiasatynyń nátijesi.
«Ana tili degenimiz – sol tildi jasaǵan, jasap kele jatqan halyqtyń baiaǵysyn da, búgingisin de, bolashaǵyn da tanytatyn, sol halyqtyń máńgiliginiń máńgilik máselesi. Ana tilin tek ógei uldary ǵana mensinbeidi, ógei uldary ǵana aiaqqa basady», dep Ǵ. Músirepov aitqandai eldiń bolashaǵyn, tildiń bolashaǵyn saqtaý barshanyń mindeti. Qazirgi jahandaný kezeńinde elimizdiń aqparattyq keńistigin álemdik standarttarǵa sai keńeite otyryp, memlekettik tildi ulttyq qaýipsizdiktiń mańyzdy bir nysany retinde jetildirýdi jáne qorǵaýdy jan-jaqty qamtamasyz etkenimiz abzal», - deidi Qanat Tósekbaev.
