QR Memlekettik qyzmet isteri agenttigi talantty mamandardy izdeidi. Bul týraly QR Memlekettik qyzmet isteri agenttiginiń tóraǵasy Anar Jaiylǵanova aityp berdi, dep habarlaidy QazAqparat.
«Agenttiktiń aýmaqtyq departamentteri akademiia filialdarymen tyǵyz jumysty jalǵastyryp, memlekettik qyzmetshilerdiń áleýetin damytý sharalaryn júrgizýi qajet. Taǵy bir jumys – talanttardy izdestirý jáne olardy memlekettik qyzmetke tartý bolýy kerek», - dedi Jaiylǵanova QR Memlekettik qyzmet isteri agenttiginiń Alqa otyrysynda.
Onyń aitýynsha, talanttardy izdeý sharasy aýyldyq okrýgter, aýdandyq jáne oblystyq deńgeidegi jergilikti atqarýshy organdardy jáne ortalyq memlekettik organdardyń aýmaqtyq bólimshelerin qamtyp, memlekettik basqarý júiesiniń barlyq deńgeilerinde júzege asýy qajet.
«Tiisti úilestirý jumystary respýblikalyq deńgeide júrgizilýi tiis. 2008 jyly Prezidenttiń Jarlyǵymen qurylǵan Memlekettik saiasattyń ulttyq mektebi (MSUM) qyzmetin qaita qaraityn kez keldi. Joǵary býyn basqarýshylaryn daiarlaý mindetterin iske asyrýdy tolyq qamtamasyz etý qajet. Akademiiaǵa bitirýshi túlekterdi saiasi laýazymdarǵa ornalasý úshin kadrlyq rezervke qosý múmkindigimen MSUM-dy odan ári damytý boiynsha usynystar engizýdi tapsyramyn», - dep qorytyndylady Anar Jaiylǵanova.
