Áleýmettik jelilerde «Memlekettik kirister komiteti sheteldikter tegin bergen 16 tonnalyq ottegi syiymdylyǵyn elge kirgizbei otyr» degen taqyryppen material jariialanǵan bolatyn. Osy máselege orai QR Qarjy ministrligi túsinikteme berdi, dep habarlaidy "Ult aqparat".
«Mán-jaidy anyqtaý úshin Memlekettik kirister komiteti «Azot zaýyty» JShS-nyń bas direktory Álmuhametov Erbolatpen habarlasty. Ol zaýyttyń gýmanitarlyq kómek retinde aqysyz negizde pandemiia kezeńine aýrýhanalarǵa gaz saqtaityn ottegimen qamtamasyz etýge arnalǵan 2 tsisternany (syiymdylyqty) Niderlandtan eki aptanyń ishinde ýaqytsha ákelýdi josparlap otyrǵandyǵyn túsindirdi. Qazirgi ýaqytta deklaratsiialaý úshin taýar boiynsha málimetter men qujattar joq. Atalǵan máselege bailanysty Batys Qazaqstan oblysy boiynsha Memlekettik kirister departamentine ótinish kelip túspegen«,- dep atap ótedi ministrlikten.
Degenmen, vedomstvo málimetinshe, gýmanitarlyq aqysyz kómek retinde taýarlar ákelingen jaǵdaida, mundai júkter keden organyna myna qujattardy usynǵan kezde kedendik bajdardy tóleýden bosatylady: kóliktik (tasymaldaý) ne kommertsiialyq qujattar jáne (nemese) taýardy ákelý maqsaty kórsetilýi tiis diplomatiialyq nemese olarǵa teńestirilgen ókildikterdiń rastaýy; taýarlardyń aqysyz berilý faktisin rastaityn taýarlardy jóneltýshiniń rastaýy; taýardy alýshynyń taýarlardy maqsatty paidalanýy týraly mindettemesi.
Kedendik tólemderdi tóleýden bosatý úshin «Salyq jáne biýdjetke tólenetin basqa da mindetti tólemder týraly» Qazaqstan Respýblikasynyń Kodeksiniń 399-baby jáne «Qazaqstan Respýblikasyndaǵy kedendik retteý týraly» QR Kodeksiniń 80-baby negiz bolyp sanalady.
Atalǵan taýarlardy kommertsiialyq maqsatta keri qaitarý sharttarymen ákelgen jaǵdaida, ýaqytsha ákelý kedendik rásimi qoldanylýy múmkin. Kórsetilgen rásim kezinde tiesili kedendik tólemder men salyqtar somasynan 3 paiyz kóleminde tólemder tólenýge jatady ne bolmasa tólemderdi tóleýden bosatý belgilengen taýarlardyń (onyń ishinde meditsinalyq taýarlar) tizbesine sáikes bolǵan jaǵdaida kedendik tólemderdi tóleýden tolyq bosatylady.
