Almatydaǵy memlekettik mektepter ata-anany mektep formasyn naqty bir dúkennen satyp alýǵa mindettei almaidy, mekteptegi sport sektsiiasy men úiirme de tegin bolýy tiis. Sonymen qatar qala mektepteri bes kúndik oqý aptasy boiynsha jumysyn jalǵastyrady, alty kúndik oqý aptasyna kóshý týraly bekitilgen jospar joq. Almatynyń Óńirlik kommýnikatsiialar qyzmetinde qalalyq Bilim basqarmasynyń basshysy Sáken Aralbaev osylai dep málimdedi, dep habarlaidy ult.kz.
Qazir ata-analarǵa naqty bir jetkizýshini nemese dúkendi usynatyn bolyp júr. Sáken Aralbaevtyń aitýynsha, mundai talap zańsyz. Mektep ata-anany kiimdi bir jerden satyp alyp, basqa formany tańdaýǵa májbúrlei almaidy.
Almatydaǵy №222 mektepte biyl osyndai jaǵdai tirkelgen. Ata-analardyń shaǵymynan keiin Bilim basqarmasy tekserý júrgizip, mektep direktoryna qatysty tártiptik shara qoldanypty. Keiin bul máseleni qaladaǵy mekteptiń basshylarymen taǵy talqylaǵan.
«Mektep ákimshiliginiń ata-analardy naqty bir dúkenge baryp, belgili bir formany satyp alýǵa májbúrleýge qaqysy joq. Mundai jaǵdai bolyp jatsa, birden bizge habarlap aityńyz», – deidi Sáken Aralbaev.
Almatyda mektep formasy qoiý kók tús bolýdy usynǵan. Alaida bilim basqarmasy bul ázirge usynys qana ekenin aitady. Mektep naqty bir úlgini, óndirýshini nemese saýda ornyn tańýdy talap ete almaidy.
Baspasóz konferentsiiasynda talqylanǵan taǵy bir másele – aqyly úiirmeler men sektsiialar boldy. Ótken oqý jylynda ata-analar memlekettik mektepterde qosymsha sabaq úshin aqsha talap etkenin aityp shaǵymdanǵan.
Mekteptiń ózi uiymdastyratyn úiirme men sektsiialar tegin bolýy tiis.
«Biz memlekettik mektepterdi aityp otyrmyz. Olardaǵy bilim berý tegin, qosymsha bilim berý de solai. Mektepte sport sektsiiasy, shyǵarmashylyq úiirme men basqa da sabaq aqyly bolmaýy tiis», – deidi spiker.
Eger mektepte osyndai sabaqqa aqsha talap etip jatsa, ata-analar aldymen bilim berý uiymynyń ákimshiligine, keiin aýdandyq bilim bólimine nemese tikelei Almaty qalasynyń Bilim basqarmasyna júgine alady.
Taǵy bir mańyzdy másele – Almaty mektepteri alty kúndik oqý aptasyna kóshe me degen suraq. Buǵan deiin Oqý-aǵartý ministrligi ár mektep mundai sheshimdi óz betinshe qabyldai alatynyn habarlanǵan bolatyn.
Sáken Aralbaevtyń aitýynsha, Almatyda qazir mundai jospar joq. Qaladaǵy barlyq mektep bes kúndik oqý júiesi boiynsha jumys isteidi.
Úsh aýysymdy oqýǵa qaita oralý da josparlanbaidy. Qala Bilim basqarmasynyń basshysy qazirgi tańda Almatyda úsh aýysymdy mektepter joq ekenin aityp, aldaǵy ýaqytta qala bir aýysymda jumys isteitin mektepterdiń sanyn birtindep arttyrýdy kózdeitinin jetkizdi.
Taǵy bir suraq elektrondy kúndelikterge qatysty boldy. Almatydaǵy memlekettik mektepter BilimClass platformasyna kóshti. Elektrondy bilim berý júiesinen aqparattyń yqtimal taralýy týraly habarlamadan keiin jýrnalister oqýshylardyń derbes deregin qorǵaýdy qalai qamtamasyz etip jatqanyn surap bildi.
Bilim basqarmasynda oqýshylardyń derbes dereginiń taralýyna qatysty rastalǵan jaǵdai tirkelmegenin málimdedi. Sáken Aralbaevtyń aitýynsha, BilimClass memlekettik standarttar men aqparattyq qaýipsizdik talaptaryna sáikes keledi. Sonymen qatar derekterdi qorǵaý máseleleri beiindi memlekettik organdarmen qosymsha pysyqtalǵan.
