Foto: Polisia.kz
Qostanaida qalalyq mektepterdiń birin terrorister basyp aldy dep habar bergen besinshi synyp oqýshysynyń ata-anasy jazalanatyn boldy, dep habarlaidy Ult.kz.
4 naýryzda oqýshy politsiiaǵa habarlasyp, mektepti terrorister basyp alǵanyn aitqan. Oqiǵa ornyna ár túrli qyzmetterdiń ókilderi: politsiia, qutqarýshylar, UQK qyzmetkerleri dereý baryp, aýmaqty muqiiat teksergen. Alaida qaýip rastalmady, sondai,aq jarylǵysh zattar men kúdikti adamdar tabylmady.
Politseiler dereý qońyraý shalýshynyń jeke basyn anyqtady. Ol sol mekteptiń 5-synyp oqýshysy bolyp shyqty. Úrei týdyrǵan ázil onyń otbasy úshin aýyr zardaptarǵa ákeldi. Qazirgi ýaqytta politsiianyń kórineý jalǵan habarlaý faktisi boiynsha sotqa deiingi tergeý bastaldy. Protsessýaldyq sheshim qabyldanǵannan keiin ata-anasy jaýapkershilikke tartylady.
"Terrorizm aktisi týraly kórineý jalǵan habarlaǵany úshin bes myń ailyq eseptik kórsetkishke deiingi mólsherde aiyppul (búgingi kúni – 19,6 mln.teńge) ne sol mólsherde túzeý jumystarymen, sondai-aq bes jylǵa deiingi merzimge shekteý nemese bas bostandyǵynan aiyrý túrinde jaza kózdelgen", - deidi politseiler.
Bul qylmys úshin 14 jasqa tolǵan adamdar qylmystyq jaýapkershilikke tartylady, sondyqtan ony mektep oqýshylary da este ustaýy kerek.
Sonymen qatar sot sheshimi negizinde shyǵyndar men osyndai habarlamadan keltirilgen barlyq zalal ótelý qajet. Eger mundai áreketterdi kámeletke tolmaǵandar jasaǵan jaǵdaida, zalaldy óteý olardyń ata-analaryna nemese zańdy ókilderine júkteledi.
