Oqý-aǵartý ministrligi oqý jylyn uzartýǵa arnalǵan buiryq jobasyn ázirledi. Qujat "Ashyq NQA" portalynda qoǵamdyq talqylaýǵa shyǵaryldy, dep habarlaidy "Ult aqparat".
Qujatqa sáikes, 1-synyptarda oqý jylynyń uzaqtyǵy 35 apta bolsa, 2-11 (12)-synyptarda 36 oqý aptasy bolmaq.
Aldaǵy oqý jylynda barlyq synypqa mynadai kanikýl kezeńin belgileý usynylady:
- kúzgi kanikýl – 7 kún (2022 jyldyń 31 qazanynan 6 qarashasyn qosa alǵanda);
- qysqy kanikýl – 9 kún (2022 jylǵy 31 jeltoqsannan 2023 jylǵy 8 qańtardy qosa alǵanda);
- kóktemgi kanikýl – 9 kún (2023 jylǵy 18-26 naýryzdy qosa alǵanda).
1-synyp oqýshylary úshin de qosymsha jeti kúndik kanikýl engiziledi, bul 2023 jylǵy 6 aqpan men 12 aqpandy qosa alǵanda.
"Buiryq jobasy orta bilim berý uiymdarynda 2022 – 2023 oqý jylynyń bastalýyn, uzaqtyǵyn jáne kanikýl kezeńin aiqyndaidy.
Qosymsha eki oqý aptasyn qosý arqyly oqý jylynyń uzaqtyǵyn ulǵaitý bir kúndegi sabaqtar sanyn qysqartýǵa, bes kúndik oqý aptasyn iske asyrýǵa, «kúrdeli» taqyryptardy zerdeleý qarqyndylyǵyn tómendetýge, bilim berý protsesin damyta oqytý qaǵidattarynda uiymdastyrýǵa múmkindik beredi", - delingen habarlamada.
