Mektepterdegi meditsinalyq kabinetterdiń úzdiksiz jumysyn qamtamasyz etý qajet. Bul týraly QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Jańa oqý jyly alǵash ret erekshe formatta bastalǵaly otyr. Jalpy, jaǵdai turaqtaldy. Búginde virýspen kúreske barlyǵy jumyldyrylǵan. Sheshimder jedel rejimde qabyldanyp jatyr. Barlyq qajetti sharalar qabyldanyp, dári-dármek, tósek-oryn qory jasaqtaldy. Tósek oryn júktemesi 95-96 paiyzdan 19 paiyzǵa deiin, reanimatsiialyq tósekoryn 91 paiyzdan 24 paiyzǵa deiin tómendedi. Biraq, naýqastanyp qalý táýekeli áli de saqtalyp otyrǵandyǵyn atap ótkim keledi. Eýropanyń birqatar elinde qaita órshý baiqalady. Kún tártibinde balalardyń qaýipsizdigi máselesi turatyndyǵy sózsiz. Balalardy shtattyq rejimde oqytýǵa qatysty túrli usynystar túsip jatyr. Eger balalarmen birdeńe bolyp qalsa, bizdi eshkim keshirmeidi. Mektepter men balabaqshalar airyqsha baqylaý nysanyna ainalýy tiis. Oqý protsesine jumyldyrylǵan barlyq tulǵa balalardyń densaýlyǵy úshin derbes jaýap beredi. Bizdiń birlesip sheshýimiz qajet belgili bir máseleler de bar», - dedi Eraly Toǵjanov pedagogtar men bilim jáne ǵylym salasy qyzmetkerleriniń respýblikalyq tamyz keńesi barysynda.
Sonymen qatar ol balalardyń jańa oqý jylyn qalai bastaýyna qatysty barlyq mán-jaidy jiti oilastyrý qajettigin atap ótti. Adamdardyń jinalýyna jol bermeý qajettigin qatań eskertti.
«Mektepterde zalalsyzdandyrý quraldaryn paidalana otyryp, tyńǵylyqty tazalyq jumystaryn júrgizý qajet. Árbir synypta daiyndyq aktisi bolýy tiis. Ǵimaratqa kire beriste súzgi uiymdastyryp, teplovizorlar , dezinfektsiialyq ótkelder ornatyp, aiaq kiimge arnalǵan kilemsheler tóseý kerek. Mektepterde dezinfektsiialyq rejimdi kúsheitip, ózińmen birge maska alyp júrý kerek. Árbir synypqa jeke oqý kabineti bekitilýi tiis. Balalar bir synyptan ekinshisine kóship júrmeýi tiis. Mektepterdegi meditsinalyq kabinetterdiń úzdiksiz jumysyn qamtamasyz etý qajet», - dedi Úkimet basshysynyń orynbasary.
Eraly Toǵjanov jańa oqýǵa daiyndyq jumystary álsiz júrgizilip jatqan óńirlerdiń de bar ekendigin basa aitty.
«Birneshe ǵana kún qaldy. Al balalarymyzda kompiýter áli joq. Mektepterde pedagogtar jetispeidi. Bilim berý basqarmalarynyń árbir basshysyna oqý jylynyń bastalýyna daiyndyq boiynsha jedel sharalar qabyldaýdy tapsyramyn. Bul - árbiriniń jaýapkershiligi», - dedi Premer-Ministrdiń orynbasary.
