QR Bilim jáne ǵylym ministri Ashat Aimaǵambetov muǵalimderdi koronavirýsqa qarsy vaktsina alýǵa shaqyrdy, dep habarlaidy "Ult aqparat".
«Vaktsinaǵa qatysty ártúrli alyp-qashpa sózder bar. Ony bilemiz. Bireý bylai deidi, ekinshisi bylai deidi. Zań boiynsha vaktsina alý - ár adamnyń óz erki. Ózi sheshim qabyldaidy. Biraq, mektepterdi ashamyz, dástúrli formatqa kóshemiz desek, jalpy mektepte jumys istep, ary qarai tiisti, qajetti saǵattarymyzdy alamyz desek, árine vaktsina almasaq bolmaidy. Óitkeni, vaktsina alý - eń aldymen ózińdi, ekinshiden - jaqyndaryńyzdy qorǵaý. Úshinshiden, balalardy qorǵaýdyń birden-bir kepili», - dedi ministr respýblikalyq pedagogikalyq keńeste.
Sonymen qatar ol óziniń jáne áriptesteriniń barlyǵy qazaqstandyq jáne ózge de vaktsinalardy alǵanyn atap ótti.
«Sondyqtan sizderge úndeý jasaimyz. Kózderińiz ashyq qoi. Bilim salasynda isteitin áriptesterimiz vaktsinanyń ne ekenin bilip, adamzattyń oilap tapqan eń úlken jaqsy sheshimderiniń biri ekendigin bile turyp, vaktsina almasaq, onda kim alady? Biz - aǵartýshy salamyz. Basqalarǵa «vaktsina alyńdar, alyp-qashpa sózder ótirik, senbeńizder» dep aitýymyz kerek. Sondyqtan osy vaktsinany belsendi alýlaryńyzdy suraimyz», - degen Ashat Aimaǵambetov keibir muǵalimderdiń densaýlyǵyna, meditsinalyq kórsetilimge bailanysty vaktsina almaýy múmkin ekenin de eskertip ótti.
Sonymen qatar ol kelesi jańa oqý jylynda mektepterdiń dástúrli formatta jumys isteýi úshin muǵalimderdiń basym bóligi vaktsina alýy kerektigin aitty.
«Endigi jyly mektep ashylmasa, barlyq saǵattardy saqtap qalyp, biylǵydai otyra berýge múmkindik bola ma, bolmai ma degen de suraq týyndaidy», - dedi ol.
