Mektepterde epidemiologiialyq jaǵdaidyń turaqtylyǵy týraly aitýǵa erte. Bul týraly QR Densaýlyq saqtaý ministri Aleksei Tsoi túsindirdi, dep habarlaidy QazAqparat.
«Mektepterdegi epidemiologiialyq jaǵdaidyń turaqtylyǵy týraly aitý áli erte. Óitkeni, 1 qyrkúiekten beri áli 14 kúndik inkýbatsiialyq kezeń ótken joq. Bul onlain oqytý men kezekshi toptardaǵy jáne 180 adamǵa jetpeitin shaǵyn mektepterdegi jaǵdaidy baǵalaýǵa múmkindik beredi», - dedi ministr Ortalyq kommýnikatsiialar qyzmetinde.
Sonymen birge, spiker balalar arasynda JRVI men tumaýdyń jyl saiyn artyp kele jatqanyn eske saldy.
«14 jasqa deiingi balalar arasynda JRVI men tumaý 70% deiin tirkeldi. JRVI jáne tumaýmen aýyrǵan balalardyń immýniteti álsirep, koronavirýs infektsiiasyn juqtyrý qaýpi artady. Máselen otbasyndaǵy bir adam tumaýmen aýyrsa, barlyǵy aýyryp qalýy múmkin. Koronavirýs juqsa, jaǵdai tipten qiyndaidy. Birinshi karantinde mektepke deiingi uiymdarda kezekshi toptar ashýymyz sátsiz tájiribe boldy, onda koronavirýs infektsiiasy tirkelip, jabylyp jatty. Iaǵni, biz úshin elimizdegi qazirgi aýrýdyń tómendeý qarqynyn ustap turý mańyzdy. Balalar arasynda aýrýdy taratyp almaý kerek», - dedi A. Tsoi.
