Qazaqstanda mektepke hidjabpen kelgen oqýshyǵa qatysty qandai shara qoldanylatyny túsindirildi. Oqý-aǵartý ministrliginiń málimetinshe, aldymen oqýshymen jáne onyń ata-anasymen túsindirý jumystary júrgiziledi, dep habarlaidy ult.kz.
Mektep ókilderi ata-anaǵa mektep formasyna qoiylatyn talaptar men bilim berý uiymynyń jarǵysyn túsindiredi.
Eger oqýshy mektep formasyna qoiylatyn talaptardy buzýdy jalǵastyrsa, jaýapkershilik onyń ata-anasyna nemese zańdy ókiline júktelýi múmkin.
Oqý-aǵartý birinshi vitse-ministri Shynar Aqparovanyń aitýynsha, ata-analar bilim berý salasyndaǵy zań talaptary men mektep jarǵysyn saqtaýǵa mindetti.
Buǵan deiin ministrlik Qazaqstan mektepterindegi bilim berý júiesi zaiyrly sipatta ekenin eskertken.
Sonymen qatar mektep formasyna qoiylatyn talaptardy bilim berý uiymy ata-analarmen jáne mekteptiń ózin-ózi basqarý organdarymen birlesip belgileidi.
Vedomstvo naqty qoldanylatyn sharalar buzýshylyqtyń sipaty men qoldanystaǵy zańnama talaptaryna bailanysty bolatynyn atap ótti.
