Mektep túlekterin qorytyndy attestattaýǵa ózgerister engiziledi. Bul týraly QR Bilim jáne ǵylym birinshi vitse-ministri Sholpan Karinova aitty, dep habarlaidy QazAqparat.
«Oqýshylardyń mektep bitirýine bailanysty qorytyndy attestattaý jumysyna ózgerister engiziledi. Onyń ishinde bilimniń naqty talaptaryna qoiylatyn sharttar ózgertilip, qaitadan qarastyrylady. Sonymen birge qazaqstandyq oqýshylar halyqaralyq deńgeide óz bilimderin ári qarai da kórsetip, dáleldeidi. Osyǵan orai 2022 jyldyń sáýir aiynda PISA-22 halyqaralyq zertteýi ótkiziledi. Osy zertteýlerge qazaqstandyq oqýshylar qatysyp, olardyń bilimderin álemdik deńgeide zerdeleimiz», - dedi Sholpan Karinova ministrliktiń keńeitilgen alqa otyrysynda.
Onyń atap ótýinshe, bilim sapasyna áser etetin kórsetish – bul materialdyq-tehnikalyq bazany jaqsartý.
«2021 jyldan bastap Nur Otan partiiasynyń sailaýaldy baǵdarlamasyn iske asyrýdyń jol kartasy aiasynda 5 myń mektepti 2025 jylǵa deiin jańǵyrtý jumysy kózdelgen. Osyǵan bailanysty búgingi kúni 597 mektepte pándik kabinetter satyp alý, mektep jihazyn jańartý, onyń ishinde mektep kitaphanalary men ashanalaryn jańartý jumystary júrgizildi. Biylǵa da naqty kórsetkishter barlyq 17 óńirde belgilendi jáne iske asyrylady», - dedi ol.
