Aqtóbe oblystyq qylmystyq ister jónindegi mamandandyrylǵan aýdanaralyq sotynda mektep túlegine qatysty sot otyrysy jalǵasyp jatyr. Aiyptalýshy kózine jas alyp, qaza bolǵan A.Dúsipovtyń ata-anasynan keshirim surady, dep habarlaidy QazAqparat tilshisi.
Búgin sot otyrysynda aldymen aiyptalýshy Bekzat Keńshilikten jaýap alyndy. Ol óz sózin keshirim suraýdan bastap, óziniń esh aram oiy bolmaǵanynyn jetkizdi.
«Azattyń ata-anasy jáne týystary, shyn júregimmen, basymdy iip sizderden keshirim suraimyn. Jasaǵan qylmysymdy jáne sizderdiń aldyńyzdaǵy kinámdy eshqashan jýyp-shaia almaimyn. Biraq mende Azatty óltirý túgili, oǵan aýyr jaraqat keltirý týraly oiym bolmady. Jasaǵan qylmysymdy moiyndaimyn, biraq ol qasaqana emes. Qylmys jasaǵanym ras, biraq aram oily, jaman bala emespin. Jazamdy óteýge daiynmyn, biraq bári ádiletti bolýy tiis. Sebebi, maǵan taǵylǵan aiyp jasaǵan is-áreketterime múlde sáikes kelmeidi. Ózim Aqtóbe oblystyq mamandandyrylǵan fizika-matematika mektep-internatyn bitirdim. 25 mamyr kúni synyptastarymyzben, ata-anamyzben demalys bazasyna bardyq. Jaqsy kóńil-kúimen taraǵan soń Aida Álibekova habarlasyp, meni Azattyń izdep júrgenin aitty. Arada 2-3 kún ótken soń Azat Dúsipovtyń ózi jazdy. Bi alańyndaǵy jaǵdaidy aitqanda keshirim suradym. Ol toqtamai, balaǵattady. Qyzdar birneshe kún ótken soń Azattyń men týraly aqparat jinap júrgenin taǵy da aityp berdi. 15 maýsym kúni «Altyn belgi» ielerin marapattaý rásimine qatystym. Sol kezde Azatty kórip, ol meni taǵy balaǵattady»,- dedi aiyptalýshy Beknaz Keńshilik.
Eki túlek 18 maýsym kúni kezdeseýge kelisken. Biraq 17 maýsym kúni aiyptalýshy Beknaz Keńshilik qyzdarǵa telefon shalyp, qydyrýdy usynady. Keshkilik qydyryp, qyzdardy shyǵaryp salý kezinde aiyptalýshy taǵy Azat Dúsipovty kezdestiredi.
«Taldardyń arasyna aparyp, «osy jerden aman shyqpaisyń» dep aitty. Qatty qoryqtym. Sebebi, Azattyń boiy uzyn, deneli boldy. Namysyma tietin sózderdi aitpaýdy suradym. Biraq tyńdamai, anama qatysty las sózder aitty. Men úshin eń qymbat jan ana bolǵandyqtan bul sózderi namysyma tidi. Keiin meni urdy. Es jiia almai, basym ainaldy. Ári qarai ne bolǵanyn aita almaimyn. Qaltamda bolǵan pyshaq jerge túskende ony alǵanymdy bilemin. Pyshaqty siltep qaldym. Azat «pyshaq» dep aiqailady. Ári qarai takside otyrǵanymdy jáne ózimniń úiimde bolǵanymdy bilemin. Qatty kúizeliste boldym. Azattyń qaitys bolǵanyn ákem aitty»,- dedi aiyptalýshy B.Keńshilik.
Eske salsaq, Aqtóbe qalasyndaǵy №19 orta mektep túlegi Azat Dúsipov pyshaq jaraqatynan kóz jumdy. Buǵan deiin habarlaǵanymyzdai, oqiǵa maýsym aiynyń 17-nen 18-ne qaraǵan túni Aqtóbe qalasynyń Týrgenev kóshesinde bolǵan.
