Elimizde mektep pen ata-ana qatynasynyń jańa formaty qalyptastyrylady. Bul týraly búgin Úkimet otyrysynda QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Uly oishyl ál-Farabi aitqandai, «Tárbiesiz berilgen bilim - adamzattyń qas jaýy». Sondyqtan alǵash ret memlekettik baǵdarlamada tárbie berý, otbasylyq qundylyqtardy nasihattaý máselesi bólek baǵyt retinde qarastyrylyp otyr. Mektep pen ata-ana qatynasynyń jańa formatyn qalyptastyramyz. Qundylyqtarǵa negizdelgen bilim berýdi iske asyrý, debattyq qozǵalystardy damytý, teatrǵa baýlý, Jas qyran, Jas ulan qozǵalystaryn ary qarai damytý barlyq bilim berý deńgeilerinde júrgiziledi dep oilaimyz», - dedi 2025 jylǵa deiin Qazaqstanda bilim men ǵylymdy damytýdyń memlekettik baǵdarlamasyn tanystyrǵan ministr.
Onyń atap ótýinshe, oqýshylar men stýdentterdiń sporttyq ligalaryn qurý josparlanǵan. Búginde bul kórsetkish nebári 30 paiyzdy ǵana quraidy. Sondyqtan bul baǵyttaǵy jumys odan ary belsendi júrgizilmek.
«Al orta bilim boiynsha Joldaýda berilgen tapsyrmaǵa sáikes oqýlyqtardy ázirleý, saraptaý, basyp shyǵarýdyń jańa júiesin engizemiz. Jańartylǵan bilim berý mazmunyna kóshýdi aiaqtaimyz. Kezeńdep 12-jyldyq bilimge aýysý, kriterialdy baǵalaý jáne oqý baǵdarlamalaryn jetildirýdi qarastyryp otyrmyz. Inkliýzivti bilim berý 55 paiyzdan artyq ósip, balalardyń sapaly bilim alýyna barlyq deńgeide jaǵdai jasalatyn bolady», - dedi Ashat Aimaǵambetov.
