Qazaqstanda oqýshylarǵa mektep baǵdarlamasyn meńgerýge kómektesetin «E-Tutor» áleýmettik jobasy iske qosylady, dep habarlaidy QazAqparat.
«NU Alumni» túlekter qaýymdastyǵy bilim berýdegi tálimgerlik boiynsha osyndai jobany iske qospaq. Joba aiasynda NÝ túlekteri men stýdentteri qatarynan kýratorlar volonterlyq negizde 5-11 synyp oqýshylaryna birqatar pán boiynsha mektep baǵdarlamasyn meńgerýge kómektesedi. Oqýshylardy irikteý kezinde eń aldymen meditsina qyzmetkerleriniń otbasy múshelerine, sondai-aq kóp balaly otbasylar men halyqtyń áleýmettik osal toptaryna jatatyn otbasylardan shyqqan balalarǵa basymdyq beriledi.
Jobada oqýshylar pánderdi meńgerýde kómek alyp qana qoimai, robot tehnikasy, informatika jáne baǵdarlamalaý boiynsha úiirmelerge jazyla alady.
Sondai-aq, mentorlarmen birge balalar olimpiadalarǵa daiyndalyp, emtihandardy, sony ishinde IELTS jáne SAT-ti de tapsyrady.
«Bizdiń joba qazaqstandyq oqýshylardyń álemdik bilim berý keńistigindegi básekege qabilettiligin arttyrýǵa járdemdesý úshin oilastyrylǵan. Búgingi tańda bizdiń jobamyz elordanyń birneshe mektebin ǵana qamtidy, biraq bolashaqta elimizdiń ár óńirinen kelgen balalardy oqýda qoldaý arqyly onyń geografiiasyn keńeitýdi josparlap otyrmyz», - deidi «NU Alumni» qoǵamdyq birlestiginiń atqarýshy direktory Arman Qońqabai.
Sabaqty oqýshynyń tańdaýyna bailanysty qazaq, aǵylshyn jáne orys tilderinde ótkizý josparlanýda. Ár oqýshy 3 pánge deiin tańdai alady. Ol boiynsha kýrator apta saiyn 45 minýttan onlain-sessiia ótkizedi. Barlyq bilim berý materialdary: onlain-sabaqtardyń jazbalary, ádistemelik anyqtamalyqtar, oqýlyqtar, emtihandarǵa daiyndyq boiynsha usynymdar jobanyń arnaiy saitynda ornalastyrylady.
Búgingi kúnge deiin jobaǵa irikteýdiń barlyq kezeńinen ótken 69 kýrator-túlek qatysýǵa niet bildirgen.
