1-synyptan 11-synypqa deiingi barlyq oqýlyqtar keminde 1 jyl boiy ilki mektepderde aldyn ala beiimdeýden ótkiziledi. Bul týraly Májilistegi «Nur Otan» partiiasy parlamenttik fraktsiiasynyń keńeitilgen otyrysynda Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Oqýlyq óte mańyzdy qural jáne olardyń sapasyn kóterý úshin keshendi is-sharalar iske asyrylyp jatyr. Birinshiden, 2021 jylǵy 1 qańtardan bastap depýtattardyń qoldaýymen jańa 2 norma iske asyra bastady. Endi bilim berý baǵdarlamalary mindetti túrde aldyn ala saraptamadan, odan keiin beiimdeýden ótedi. Bul da oqýlyqtardyń sapasyn arttyrýǵa septigin tigizeri sózsiz. Ekinshiden, ministrlik osy oqýlyqtardy daiyndaýdyń jańa júiesin daiyndap, bekitti. Úshinshiden, saraptama, iaǵni saraptaý júiesi túbegeili ózgeredi. Endi saraptamadan ótkizetin bizdiń sarapshylarymyz mindetti túrde sertifikattaýdan ótetin bolady», - dedi ministr «Nur Otan» partiiasynyń «Ózgerister joly: ár azamatqa laiyqty ómir!» Sailaý baǵdarlamasyn oryndaýdyń Jol kartasyn talqylaý barysynda.
Onyń atap ótýinshe, buǵan deiin saraptama jasaý úshin muǵalimder shaqyrtylyp otyrǵan. Al onshaqty oqýlyqty qysqa ǵana ýaqyttyń ishinde saraptap shyǵý óte qiyn.
Endi olar oqytýdan, sertifikattaýdan ótkennen keiin oqýlyqtar daiyndaityn bolady. Sonymen qatar avtorlardy da oqytyp, sertifikattaýdan ótkizý rásimi bekitilip jatyr. Bul rette mańyzdy máselelerdiń biri - oqýlyqtardy beiimdeý. Endi 1 synyptan 11 synypqa deiingi barlyq oqýlyqtar keminde 1 jyl boiy ilki mektepderde aldyn ala beiimdeýden ótkiziledi. Osy jáne basqa da sheshimder oqýlyqtardyń sapasyn túbegeili kóteredi dep senemiz», - dedi Ashat Aimaǵambetov.
