Elimizdiń óńirilerinde salynýǵa tiis mektepterge biýdjetten milliardtaǵan qarjy bólingen. Alaida búginde qurylys jumystaryna 145 mlrd jetispeitindigi anyqtalyp otyr, dep habarlaidy QazAqparat tilshisi.
Májiliste «Nurly jol» baǵdarlamasy aiasynda salynýy tiis bilim nysandarynyń qurylysyna qatysty otyrys aldynda BAQ ókilderine suhbat bergen Májilis depýtaty Oleg Kazantsevtiń aitýynsha, bes jyldyq kezeńde bilim berý nysandary, atap aitqanda 175 balabaqsha men mektep qurylysy memleket tarapynan qarjylandyrylady. Atalǵan nysandar 2019 jyly tolyǵymen aiaqtalýy tiis.
«175 nysannan 19 balabaqsha paidalanýǵa berildi. Al mektepterge qatysty jaǵdai birshama túsiniksizdeý bolyp tur. Iaǵni qurylystyń aiaqtalý merzimi osy jylǵa, 2019 jylǵa aýystyrylǵan nysandar bar. 4 mektep boiynsha mán-jaidy anyqtaý ústindemiz, qazir olardyń qurylysy júrip jatyr. Problema konkýrstyq protsedýralardy jáne nysandardy tapsyrýdyń aralyq qorytyndylaryn der ýaqytynda rásimdemeýmen bailanysty. Sondyqtan bul rette jaǵdaidy túzeýge bolady», - dedi ol.
Depýtattyń aitýynsha, bilim nysandarynyń qurylysyna qatysty múldem túsiniksiz máseleler de bar. Máselen, Úkimet bekitip, nysandardyń qurylysy úshin óńirlerge bólingen 145 mlrd teńge tóńireginde qandai da bir aila-sharǵy oryn alǵan.
«Qazir Ulttyq qordan qarjylandyrý toqtatyldy. Iaǵni barlyq mindettemeler oryndaldy. Alaida bizde kóshpeli nysandary paida bolyp otyr. 2019 jyly olar qaidan qarjylandyrylatyndyǵy belgisiz. 2018 jylǵa da ázirshe naqty joba alyp otyrǵanymyz joq. Biz taiaý 2-3 apta ishinde bul protsessti talqylaimyz. Qarjy qaida ketti, nelikten jetpei qaldy, qosymsha qarjy qaidan alynady degen máseleler qaralady»», - dedi Oleg Kazantsev.
