Qazaqstannyń barlyq mektebi beinebaqylaý kameralarmen qamtamasyz etilgen, kameralardyń 55% ǵana tiisti talaptarǵa sai. Bul týraly QR Bilim jáne ǵylym ministri Ashat Aimaǵambetov Úkimet otyrysynda aitty, dep habarlaidy "Ult aqparat".
«Qazir elimizdiń barlyq mektepteri beinebaqylaý kameralarmen 100% qamtamasyz etilgen. Desek te, Bilim men ǵylym jáne Ishki ister ministrlikteriniń birlesip júrgizgen monitoringy osy kameralardyń 55% ǵana talaptarǵa sai ekeniń kórsetti. Bul máselelerdi sheshý úshin jergilikti biýdjetterden 1,4 mlrd teńge qarajat qarastyryldy.
Osyǵan bailanysty Soltústik Qazaqstan men Shyǵys Qazaqstan oblystarynda beinebaqylaý júieleri máselesi sheshimin tapsa, Túrkistan, Atyraý, Jambyl oblystarynda qarajat jetkiliksiz deńgeide qarastyrylǵan. Jergilikti ákimdikterge tiisti qarajat bólýlerin suraimyz», - dedi Bilim ministri Úkimettiń búgingi otyrysynda.
Onyń aitýynsha, Bilim berý uiymdarynda dabyl túimelerin ornatý jumystary júzege asýda. Búgingi tańda olardyń sany – 648. Tek Almaty men Nur-Sultan qalalarynda bul másele tolyǵymen sheshilgen.
«Problemany sheshý úshin jergilikti biýdjetten 980 mln teńge somasynda qarajat kózdelgen. Biraq bul áli de jetkiliksiz. Túrkistan, Pavlodar, Batys Qazaqstan oblystarynda qarajat tolyq qarastyrylmaǵan», - deidi Aimaǵambetov.
Sonymen birge, ministr qalalarda ornalasqan bilim berý uiymdaryn litsenziialanǵan kúzetpen qamtý qajettigin aitty.
«Mamandandyrylǵan kúzet qyzmeti búgingi kúni qala mektepteriniń 38%-ynda engizilgen. Jergilikti atqarýshy organdar qosymsha 828 mln teńge mólsherinde soma bóldi. Biraq áli de qosymsha qarjy bólý kerek ekeniń slaidtaǵy kesteden kórýge bolady. Qarajat 8 óńirde jetkiliksiz: Jambyl, Qostanai, Pavlodar, Túrkistan, Qyzylorda, Batys Qazaqstan, Mańǵystaý oblystary men Shymkent qalasynda», - dedi ministr.
