Aqtóbede Eset batyr shaǵynaýdanyndaǵy mektepte 3 603 bala oqidy, norma boiynsha 2400 bala oqýy kerek. Mektep ujymy dálizden, kiinetin bólmeden jańa synyp jabdyqtaǵan. Direktor da óz kabinetin balalarǵa berip, jertólege kóshken, - dep habarlaidy Massaget.kz portaly "Diapazon" basylymynyń saityna silteme jasap.
Basylym málimetinshe, mektep direktory Abzal Tájimishev 1 qyrkúiekten bastap óz kabinetin bosatyp, jertólege kóshken. Óitkeni mektepte eki aýysymmen 3603 bala oqidy. Eń kóbi - 5-synyp oqýshylary, iaǵni 495 bala. 4-synyp oqýshylarynyń sany - 460, iaǵni barlyǵy - 19 synyp. Eń sońǵy synyp - "T" synyby. Jyl saiyn mektepke 400-500 bala qosylady eken. Al mektepte oryn jetispeidi.
Mektep direktory Abzal Tájimishev te jertólede jumys istep, sonda jinalys ótkizedi. Ol jertóleden jaily kabinet jasap alǵan, qazir direktorlar kabinetinde 11-synyp oqýshylary oqidy.
"1 qyrkúiekten beri osyndamyn. Norma boiynsha bir aýysymda 1200 oqýshy bolýy kerek, iaǵni eki aýysymmen 2400 oqýshy oqýy qajet. Al bizde 3 603 oqýshy oqidy, iaǵni 1203 oqýshy asyp ketip tur. Biz qoldanýǵa bolatyn barlyq nárseni qoldandyq - kiinetin bólmeler, dáliz, jertóle", - deidi ol.
