Bilim jáne ǵylym ministrligi mektep direktorlary men orynbasarlarynyń jalaqysyn ósirýdi qarastyryp jatyr. Bul týraly májiliste muǵalim mamandyǵynyń bedelin arttyrý máseleleri talqylanyp jatqan otyrysta vitse-ministr Ashat Aimaǵambetov aitty, dep habarlaidy Sputnik Qazaqstan.
"Memleket basshysynyń joldaýda bergen tapsyrmasyna sáikes, muǵalimderdiń ústemeaqysy ósip otyr. Biraq mektep direktorlary men olardyń orynbasarlarynyń eńbekaqysyna qatysty másele bar. Biz bul máseleni attestatsiia arqyly sheshýdi josparlap otyrmyz. Qazir mektep direktorlary azamattyq qyzmetkerler retinde úsh jylda bir ret attestatsiiadan ótedi. Shaǵyn mektep bolsa da, úlken mektep bolsa da, tipti direktordyń jumysynyń tiimdiligine de qaramastan onyń jalaqysy óspeidi, ústemaqy joq", — dedi vitse-ministr.
Sondyqtan, onyń aitýynsha, búginde bilim ministrligi bul suraqty qarastyryp jatyr.
"Áriptesterimizben talqylaýdamyz. Mektep direktorlary men olardyń orynbasarlarynyń eńbekaqysyn differentsiialdaý múmkindigin qarap jatyrmyz", — dedi ol.
Eske sala ketsek, Elbasy biylǵy joldaýynda bilim berýdiń jańartylǵan mazmunyna kóshken ustazdardyń laýazymdyq jalaqysyn 2018 jyldyń 1 qańtarynan bastap 30 protsentke kóbeitýdi tapsyrǵan bolatyn. Sonymen qatar 2018 jyly kategoriialar arasyndaǵy alshaqtyqty arttyryp, muǵalimder úshin biliktilik deńgeiin eskeretin kategoriialardyń jańa kestesi engiziledi. Nátijesinde, muǵalimderdiń jalaqysy biliktiliginiń rastalýyna bailanysty tutastai alǵanda 30 protsentten 50 protsentke deiin ósedi.
