1992 jyly qazirgi Taýsamaly, burynǵy Kamenka aýylynda tuńǵysh qazaq mektebi esik ashty. Bul igi iske ultyn súigen biraz patriot azamattar bir kisidei atsalysty.
1993 jyly 1 qyrkúiekte, alǵashqy qońyraýda mektepke balalar ádebietiniń klassigi, áigili jazýshy Berdibek Soqpaqbaevtyń esimi berilgeni týraly sheshim oqyldy. Oǵan mekteptiń ashylý saltanatyna qatysqan sol kezdegi aýyl keńesiniń tóraǵasy Mádeniet Tastanbekuly Kárkenov (qazir aýdandyq aqsaqaldar keńesiniń tóraǵasy), mektep direktory Ultai Amangeldiqyzy Barhinova (qazir Qarasai aýdanynda ákimshilik qyzmette) jáne basqa da quzyrly oryndardan kelgen adamdar, sonymen birge, búkil ata-analar men ustazdar, barlyq aýyl turǵyndary kýá.
Osy mektepte Berdibek Soqpaqbaevtyń týǵanyna 80 jyl tolýyn úlken saltanatpen ótkizgenbiz. Oǵan Berdibektiń kózin kórgen belgili aqyn-jazýshylar Qadyr Myrza-Áli, Áshirbek Syǵai, Kádirbek Segizbaev, Baqqoja Muqai, Shekerbek Sadyhanov, Temirhan Tebegenov, Asqanbai Erǵojaev sekildi qalamgerler jáne Berdibek Soqpaqbaevtyń jary, qyzy, basqa da týǵan- týysqandary, Raiymbek aýdanynan arnaiy delegatsiia kelip qatysqan edi.
Jyldar jyljyp ótkende Almaty qalasynda jańa aýdan shańyraq kótergenine orai barlyq mektepti qaita tirkeý júrgiziledi. Sol kezde mektepke klassik jazýshynyń esimi berilgeni jónindegi qujat «joq» bolyp shyǵady. Mektep aldymen Qaskeleń aýdanyna, sodan soń Qarasai aýdanyna, odan keiin Áýezov aýdanyna, keiin Naýryzbai aýdanyna aýysty. Osy aýysýlar kezinde qujat bir qaltarysta qalǵan ǵoi. Aqiqatyna kelgende jaýapkershilikpen izdegen jan bolmaǵan. Kóp uzamai «mektepke Berdibek Soqpaqbaevtyń aty berilgeni jónindegi sheshim joq eken» degen jeleýmen qasietti esim aiaqastynan alynyp tastalǵan da, «№188 orta mektep» deline salǵan. «B.Soqpaqbaevtyń aty berilgeni jónindegi sheshim joq eken» degen sóz jalǵan – 1993 jyly Almaty oblysy ákimdiginiń 15 qyrkúiekte shyǵarǵan №135 sheshimi áli óz kúshin joiǵan joq.
Qazir bul mektep jańa qurylǵan Naýryzbai aýdanynyń enshisinde. Mektepte alǵash eki júzdei ǵana oqýshy tabaldyryq attasa, qazir myńnan astam bala oqidy.
1993 jyldan bastap Naýryzbai aýdany qurylǵanǵa deiin Berdibek Soqpaqbaev atyndaǵy orta mektepti bitirgeni jóninde qanshama túlek attestat aldy. Osy jyldar ishinde «Berdibek Soqpaqbaev atyndaǵy qazaq orta mektebi» dep mór basylǵan qanshama qujat toltyryldy. Sonyń bári zańsyz, Berdibek Soqpaqbaevtyń esiminiń berilýi de durys emes bolyp shyǵa ma, sonda?
Qazaqtyń atyn álemge tanytqan klassik jazýshynyń esimin urpaq jadynan óshirip almai, qaita onyń ómiri men shyǵarmalaryn nasihattaý arqyly jas býyn sanasyna otanshyldyq rýhty sińirýge muryndyq bolyp kele jatqan mektepke Berdibek Soqpaqbaev esimin qaitarýymyz kerek. Bul meniń ǵana sózim emes, bul mektep ustazdarynyń da, ata-analarynyń da, túlekteriniń de, qazirgi shákirtteriniń de tilegi.
R.S. Tipti qinalatyn eshteńe joq. Burynǵy aty «Berdibek Soqpaqbaev atyndaǵy qazaq orta mektebi» edi. Qazirgisi «№188 qazaq orta mektebi» bolyp tur. Osy ekeýin biriktirip «Berdibek Soqpaqbaev atyndaǵy №188 qazaq orta mektebi» dep atasaq boldy emes pe!
Saǵatbek MEDEÝBEKULY,
Bilim berý isiniń qurmetti qyzmetkeri
"Egemen Qazaqstan" gazeti
