Abaitanýshy ǵalym, «Abaitaný» ǵylymi-zertteý ortalyǵynyń direktory Mekemtas Myrzahmetov QR Prezidenti Nursultan Nazarbaevtyń «Uly dalanyń jeti qyry» maqalasyna qatysty pikirin bólisti.
Filologiia ǵylymdarynyń doktory, professor M.Myrzahmetovtyń aitýynsha, Prezident maqalasy der kezinde jariialanyp otyr.
«Bizdiń tarihi sanamyz janshylǵan, umytylǵan, nebir eýropatsentristik kózqarastyń astynda qalǵan beishara jaǵdaida bolatyn. Tarihi sanany jańǵyrtý, jurtqa jariialaý - úlken erlik. Bul maqala kóp adamǵa oi salady. Tarihty, uly dalanyń tarihyn biz áli asha alǵanymyz joq. Bizdiń uly dalamyzda nebir uly adamdar ótken. Sonyń kóbin biz bile bermeimiz. Taiaý arada biz Shymkentte «Attila i gýnskaia orda» degen kitap shyǵardyq. Attila V ǵasyrda artta qalǵan, saiasi uǵymy áli tereń ermes, memleket túrlerin bilmeitin búkil Eýropany, halyqty jańǵyrtyp solarǵa ideia bergen, tiriltken adamdardyń biri boldy. Bul týraly Bolgar tarihshysy erterekte jazǵan. Biraq Resei tarihshylary ony jaýyp qoiǵan. Kóbin joiyp jibergen. Sebebi, mundai ǵylymi dúnieler ashylyp ketkende ne bolady? 842 jyly bolgar tilinde «Shań qyzy» degen dastan shyqqan. Orys tiline aýdarylǵan eken. Kólemi óte úlken. Bizdiń búkil dúnietanymymyz sonda tur. Túrikterdiń qaidan shyqqany, qalai qalyptasqany barlyǵy jazylǵan. Sonyń bárin bizden jasyryp keldi. Aittyrmai keldi. Elbasynyń búgingi maqalasy tarihi sanany kóterýdiń, halyqqa jetkizýdiń keremet metodologiiasy retinde jazylǵan», - dedi Mekemtas Myrzahmetov.
Ǵalymnyń aitýynsha, endigi kezekte qazaq tarihshylary men zertteýshiler eýropatsentristik baǵyttaǵy izdenisten bas tartýy tiis.
«Biz kóp jaǵdaida Eýropaǵa elikteimiz. Eýropa rýhani azyq berýden qalǵan. Endi olarǵa ony biz bere bastaimyz. Iasaýidiń ilimi, Abaidyń «Tolyq adam» ilimi, Shákárimniń «Ar ilimi» olardyń qolynda joq. Osyny jazyp tez arada halyqqa berýimiz kerek. Men jaqynda akademiiada istegende Abaidyń «Tolyq adam» ilimine monografiia jazýdy aiaqtadym. Sonda uqqanym, adamdy jaman qylyqtan tazalaýdyń quraly bizde eken. Sondyqtan, osy bai tarihymyzben, muramyzben nege maqtanbasqa?!», - dedi ol.
Eske salaiyq, búgin QR Prezidenti Nursultan Nazarbaev «Uly dalanyń jeti qyry» atty maqalasyn jariialaǵan bolatyn.
.jpeg)