Tarif qaishylyǵy Prezidenttiń meditsina qyzmetkerlerine jalaqyny 30% arttyrý tapsyrmasyn keshiktirip jatyr. Májilis depýtaty Gúldara Nurymova QR Premer-Ministriniń orynbasary Eraly Toǵjanovtyń atyna joldaǵan saýalynda osyndai másele kóterdi, dep habarlaidy QazAqparat.
«Densaýlyq saqtaý ministriligi qoǵammen birlesip meditsina qyzmetkerlerine sanattary úshin aqy tóleý jóninde kelisim jasady. Durys tendentsiia. Degenmen, kelisim jasalǵanymen sanattarǵa tóleý máselesi sheshilgen joq. Óz kezinde, Áleýmettik Meditsinalyq Saqtandyrý Qory men meditsinalyq mekemeler arasynda jyl basynda kelisimshart jasalady. Biraq, jańa tarifter tek sáýirde jetedi. Osynyń nátijesinde keibir meditsina ujymdary artyq qyzmet jasasa, ol ótelmeidi. Bul meditsina mekemege basym kópshiligine úlken ziian ákeledi», - dedi depýtat.
Aitýynsha, tolyq pysyqtalmaǵan kelisimniń kesirinen Prezident tapsyrmasynyń oryndalý barysyna ziian tiip jatyr.
«Prezident Qasym-Jomart Kemeluly Toqaev meditsina salasynyń qyzmetkerlerine jalaqyny 30% arttyrý jóninde tapsyrma berdi. Biraq tarif qaishylyǵyna bailanysty bul tapsyrma tolyq oryndalmai otyr. Óitkeni, barlyq aýyrtpalyq meditsina mekemesine júktelgen. Mekemeniń ózin damytýǵa az qarajat qalady», - dedi Gúldara Nurymova.
Májilis depýtaty bul problemany sheshý úshin «AMANAT» fraktsiiasynyń birneshe naqty usynys tastady. Olar:
- tarifterdi jyldyń basynda bekitý;
- meditsina mekemesine jalpy jasalǵan qyzmetine qarai tóleý;
- meditsina qyzmetkerlerine sanattary úshin aqy tóleý máselelerin jedel sheshý.
