Bolat Tókejanov Meditsinalyq saqtandyrý qorynyń basshysy bolyp taǵaiyndaldy, dep habarlaidy "Ult aqparat" QR Densaýlyq saqtaý ministrliginiń baspasóz qyzmetine silteme jasap.
Bolat Turǵanuly Tókejanov QR Densaýlyq saqtaý ministriniń buiryǵymen «Áleýmettik meditsinalyq saqtandyrý qory» KEAQ Basqarma tóraǵasy bolyp taǵaiyndaldy. Búgin Densaýlyq saqtaý ministri Aleksei Tsoi Bolat Tókejanovty qor ujymyna tanystyrdy.
«Bolat Turǵanuly densaýlyq saqtaý júiesinde tájiribesi mol, saladaǵy eń mańyzdy reformalardy júzege asyrýǵa tikelei qatysqan, barlyq problemany ishten jaqsy biledi. Bul óte qundy tájiribe, óitkeni meditsinalyq saqtandyrý qorynyń halyqqa arnalǵan meditsinalyq kómekti strategiialyq satyp alýshy retinde jáne MÁMS pen TMKKK paketiniń qarjylyq operatory retinde erekshe mártebesi bar. Barlyq protsesti - satyp alý men meditsinalyq kómekti qarajylandyrý isin ashyq jáne júieli júzege asyrý kerek. Qazir elimizdiń densaýlyq saqtaý salasy qiyn kezeńdi bastan ótkizip otyr, bul retet koronavirýsqa qarsy kúres sharalarynyń shyǵynyn óteýde saqtandyrý qorynyń róli óte mańyzdy», - dedi ministr A. Tsoi.
Ministr bul taǵaiyndaýdyń artynda úlken jaýapkershilik turǵanyn jáne Memleket basshysy qoiǵan mindetterdi qysqa ýaqytta oryndaý qajettigin de atap ótti.
Bolat Tókejanov 1972 jyly 19 shildede Shyǵys Qazaqstan oblysynda dúniege kelgen.
1994 jyly Qazaq Memlekettik basqarý akademiiasyn «Ekonomist» mamandyǵy boiynsha bitirgen. 2010 jyly QR Prezidenti janyndaǵy Memlekettik basqarý akademiiasynyń ulttyq memlekettik saiasat mektebinde memlekettik jáne jergilikti basqarý magistri dárejesin aldy.
AQSh, Soltústik Karolina shtatynyń Darem qalasyndaǵy Diýk ýniversitetiniń Senford qoǵamdyq saiasat mektebinde, sondai-aq, Singapýrdaǵy Li Kýan Iu atyndaǵy ulttyq ýniversitettiń memlekettik saiasat mektebinde oqyǵan.
Bolat Tókejanov Qazaqstannyń salyq qyzmeti júiesinde jumys tájiribesi bar, Shyǵys Qazaqstan oblysyndaǵy densaýlyq saqtaý uiymdaryn basqardy.
QR Densaýlyq saqtaý ministrliginde basshylyq qyzmetterdi atqardy. QR Densaýlyq saqtaý ministrliginiń vitse-ministri, jaýapty hatshysy bolyp jumys istedi.
«Qurmet» ordenimen marapattalǵan, QR Densaýlyq saqtaý úzdigi. Úilengen, úsh bala tárbielep otyr.
Eske sala ketsek, Memleket basshysy Qasym-Jomart Toqaevtyń tóraǵalyǵymen ótken Úkimettiń keńeitilgen otyrysynda MÁMS qory men «SQ Farmatsiia» basshylaryn jumystan shyǵarýdy tapsyrǵan bolatyn.
QR Densaýlyq saqtaý ministriniń 2020 jylǵy 10 shildedegi buiryǵymen berilgen ótinish negizinde «Áleýmettik meditsinalyq saqtandyrý qory» KEAQ Basqarma tóraǵasy Aibatyr Jumaǵulov qyzmetinen bosatyldy.
