Meditsinalyq saqtandyrý júiesiniń negizgi mindeti – meditsinalyq uiymdardy úzdiksiz qarjylandyrý jáne KVI-men kúreske jumyldyrylǵan meditsina qyzmetkerlerin materialdyq qoldaý. Qor bul mindetti tolyq oryndady. Ortalyq kommýnikatsiialar qyzmetinde ótken brifingide Áleýmettik meditsinalyq saqtandyrý qorynyń Basqarma tóraǵasy Bolat Tókejanov osylai aitty, dep habarlaidy QazAqparat.
«2020 jyl ózderińiz biletindei, bárimizge, ásirese, elimizdiń densaýlyq saqtaý júiesi úshin qiyn boldy. Meditsinalyq saqtandyrý júiesin júzege asyrý kezeńi koronavirýs pandemiiasymen tuspa tus keldi. Qordyń negizgi mindeti meditsinalyq uiymdardy úzdiksiz qarjylandyrý jáne KVI-men kúreske jumyldyrylǵan meditsina qyzmetkerlerin materialdyq qoldaý. Qor bul mindetti tolyq oryndady», - deidi Áleýmettik meditsinalyq saqtandyrý qorynyń Basqarma tóraǵasy Bolat Tókejanov.
Onyń aitýynsha, aýrýdyń kóbeiýine daiyndyq barysynda birneshe mańyzdy qadam jasalyp, iske asyryldy. Pandemiia kezinde alǵashqy meditsinalyq-sanitarlyq kómektiń róli kúsheitildi: mobildi toptar qurylyp, úidegi kúndizgi statsionarlar uiymdastyryldy jáne meditsinalyq qyzmet qashyqtan formatta kórsetile bastady.
«Sonymen qatar, PTR diagnostikasy boiynsha zerthanalyq qyzmettiń múmkindigi artty. Qor meditsinalyq kómektiń meditsinalyq saqtandyrý júiesine qatysý-qatyspaýyna qaramastan búkil halyqtyń osy kómekke qol jetimdiligin qamtamasyz etti. Fors majorlyq jaǵdailarǵa qaramastan, mindetti meditsinalyq saqtandyrýdy engizýdiń birinshi jylynyń nátijeleri meditsinalyq saqtandyrý júiesiniń tolyq jumys isteitindigin kórsetti. Ol densaýlyq saqtaý júiesine 500 milliardtan astam teńge quiýǵa múmkindik berdi. Osy qarajat esebinen meditsinalyq qyzmetterdiń – sirek kezdesetin sala mamandarynyń keńesteri, diagnostika, tekserýler, kúndizgi statsionar qyzmetiniń kólemi edáýir ósti. Endi bizde joǵary tehnologiialyq operatsiialardy qarjylandyrýǵa jáne meditsinalyq qyzmettiń osy túrine kezekti azaitýǵa múmkindik bar», - deidi ol.
