Elimizdiń jas dárigerleri jumysqa elektrondy túrde tura alatyn boldy. Bul týraly QR Densaýlyq saqtaý vitse-ministri Oljas Ábishev óziniń Facebook paraqshasynda jazdy.
Atap aitqanda, JOO-ny meditsinalyq mamandyq boiynsha bitirgen túlekter www.enbek.kz portaly arqyly jumyspen qamtylmaq. Bul jobany QR Densaýlyq saqtaý ministrliginiń tsifrlyq keńsesi men QR Eńbek jáne halyqty áleýmettik qorǵaý ministrligi birlesip, iske qosty.
«Biz mynadai kórsetkishterge qol jetkizdik: túlekterge jumysqa ornalasý týraly sheshim qabyldaý úshin barlyq derekterge qoljetkizýge múmkindik jasaldy; meditsinalyq mekemeniń naqty qajettilikteri anyqtaldy, jergilikti biýdjet esebinen kadrlardy daiarlaýdy josparlaý protsesin ońtailandyrdyq (ákim granty). Qazirgi tańda qaǵaz ótinishter men bitpeitin biýrokratiia joq», – deidi O. Ábishev.
Onyń sózinshe joǵaryda atalǵan sharalar mamandardy daiarlaýǵa septigin tigizedi. Buǵan qosa, meditsinalyq mekemelerge jumysqa ornalasýdaǵy kedergilerdi bilýge yqpal etedi.
«2019 jyldan bastap Astana meditsina ýniversitetiniń barlyq túlekteri jumysqa tsifrlyq formatta ornalasa alady. Al 2020 jyly Qazaq ulttyq meditsina ýniversiteti, Qaraǵandy meditsina ýniversiteti, Semei meditsinalyq ýniversiteti jáne Batys-Qazaqstan meditsina ýniversiteti tolyqtai elektrondy formatqa kóshetin bolady», – dep jazady vitse-ministr.
2019 jyldyń 31 mamyryndaǵy kórsetkishterge súiensek, enbek.kz portalynda 648 meditsinalyq mekeme bar. Meditsinalyq JOO túlekteri úshin 10103 bos jumys orny qarastyrylǵan. Túlekterdiń 80 paiyzy (6340) atalmysh saitqa tirkelgen.
Eske sala ketsek, elektrondy eńbek birjasy engizilgennen keiin elimizde jumysqa ornalasýshylardyń sany 17 paiyzǵa artqan. Kóbine jalpy proffesiianyń jumysshylary (muǵalimder, dárigerler, temir sheberleri, júk tasýshylar jáne t.b.) jumyspen qamtamasyz etilýde.
