Qazaqstanda meditsinalyq kómek kórsetetin mobildi brigadalar sany 7,6 esege ulǵaityldy. Bul týraly QR Densaýlyq saqtaý ministri Aleksei Tsoi aitty, dep habarlaidy QazAqparat.
«Koronavirýs infektsiiasy pandemiiasynyń saldarynan oryn alǵan jaǵdaidy eskere otyryp, sizderdiń nazarlaryńyzdy ministrliktiń halyqqa meditsinalyq kómek kórsetý júiesin nyǵaitý boiynsha qabyldaǵan sharalaryna aýdartqym keledi. Halyqqa alǵashqy meditsinalyq-sanitarlyq kómekti sapaly ári der ýaqytynda kórsetýdi jaqsartý aiasynda mobildi brigadalardyń sany 478-den 3 640-qa nemese 7,6 esege ulǵaityldy. Brigadalar úide meditsinalyq kómek kórsetý úshin qajetti klinikalyq-diagnostikalyq minimýmmen jabdyqtalǵan. Osy jyldyń shildesinen mobildi brigadalar 280 myńnan astam qyzmet kórsetti», - dedi ministr IX Azamattyq forým aiasynda úkimettik emes uiymdar ókilderimen kezdesýi barysynda.
Onyń aitýynsha, koronavirýsqa shaldyqqandardy, sonymen qatar dispanserlik eseptegi jáne 65 jastan asqan naýqastardy, júkti áielderdi qashyqtan qarqyndy qadaǵalaý uiymdastyryldy. Koronavirýs juqtyrǵan naýqastarǵa konsýltatsiialyq kómek kórsetý úshin quramynda joǵary oqý oryndarynyń, ǵylymi ortalyqtar men ǵylymi-zertteý institýttarynyń professor-oqytýshy quramynan jasaqtalǵan óńirlik jáne respýblikalyq sarapshylar toby jasaqtaldy.
«Jedel kómek avtokólikteriniń parki jańartyldy. 703 tehnika qazirgi ýaqytta jetkizilse, 464 sanitarlyq mashina jetkizý satysynda tur. Jedel kómek jetýiniń ortasha ýaqyty 25 minýttan 14 minýtqa deiin qysqardy. Buǵan qosa, Memleket basshysy aýyldarǵa meditsinalyq qyzmet kórsetýdi jaqsartý boiynsha sharalar ázirleýdi tapsyrǵan bolatyn. Osyǵan orai, aýyl turǵyndaryna ambýlatorlyq kómekti qoljetimdi jasaý úshin 100 jyljymaly meditsinalyq keshen satyp alynyp, óńirlerge jetkizilip jatyr», - dedi Aleksei Tsoi.
Sonymen qatar aýyldarda alǵashqy meditsinalyq-sanitarlyq kómek kórsetetin 300 jańa nysan ashý jáne 137 ambýlatorlyq-emhana ǵimaratyn salý josparlanǵan.
