Áleýmettik meditsinalyq saqtandyrý qory meditsina qyzmetkerleriniń jalaqysyn kóterýge 132 mlrd teńge baǵyttaidy, dep habarlaidy QazAqparat.
Áleýmettik meditsinalyq saqtandyrý qorynyń basqarma tóraǵasy Bolat Tókejanov Ortalyq kommýnikatsiialar qyzmetinde osyndai jańalyǵyn bólisti.
«Dárigerlerdiń jalaqysyn 30% deiin jáne orta meditsina qyzmetkerleriniń jalaqysyn 20% deiin arttyrýǵa 132 mlrd teńge bólindi. Jalaqyny arttyrý Áleýmettik meditsinalyq saqtandyrý qorynyń meditsinalyq qyzmetterge aqy tóleý tarifterinde kózdelgen. Qazirgi ýaqytta elimizdegi dárigerler sany 76 myń shtattyq birlikti quraidy, onyń 32 myńy – beiindi mamandar», - dedi qordyń basqarma tóraǵasy.
Meditsina qyzmetkerleriniń jalaqysyn kezeń-kezeńimen 2023 jylǵa qarai ekonomikadaǵy ortasha jalaqydan eki jarym ese joǵary deńgeige deiin arttyrý kózdelgeni belgili.
«2021 jyldyń 1 qańtarynan bastap 247 myń meditsina qyzmetkeriniń jalaqysy ósti. 30% - dárigerlerdiń, 20% orta meditsina qyzmetkerleriniń eńbekaqysy ulǵaidy. Osylaisha, 2023 jyly dárigerlerdiń ortasha jalaqysy shamamen 561 myń teńgeni, orta meditsinalyq qyzmetkerlerdiń jalaqysy 210 myń teńgeni quraidy», - dedi Bolat Tókejanov
