Qazaqstanda salalyq jýrnalisterge arnalǵan bir ailyq onlain-kýrs aiaqtaldy. Osyǵan orai, búgin Nur-Sultan qalasynda QR Aqparat jáne qoǵamdyq damý vitse-ministri Kemelbek Oishybaevtyń qatysýymen «2020 jylǵy qazaqstandyq jýrnalistika: syn-tegeýrinder men múmkindikter» atty qorytyndy dóńgelek ústel otyrysy ótti, dep habarlaidy "Ult aqparat".
«Qarjy, quqyq, meditsina, dini, sondai-aq tsifrlandyrý salalaryndaǵy problemalyq máseleler boiynsha aqparatty halyqqa jetkizý tiimdiligin arttyrý» atty granttyq joba QR Aqparat jáne qoǵamdyq damý ministrliginiń qoldaýymen «Azamattyq bastamalardy qoldaý ortalyǵy» KeAQ-tyń memlekettik granty aiasynda júzege asyrylǵan bolatyn.
Atap aitqanda, 12 qazan - 13 qarasha aralyǵynda meditsina, sondai-aq qarjylyq, quqyqtyq, dini jáne tsifrlyq saýattylyq taqyryptarynda jýrnalisterge arnalǵan onlain-kýrstar, barlyǵy 25 sessiia ótkizildi.
Joba trenerleri – halyqaralyq jáne qazaqstandyq jýrnalister, mediasarapshylar, sala ókilderi.
Kemelbek Oishybaev kadrlyq áleýettiń jáne salalyq jýrnalistikanyń BAQ damýyndaǵy mańyzdy rólin atap ótti. Sebebi mamandardyń kásibi biliktiligi sapaly jáne suranysqa ie kontent jasaýǵa múmkindik beredi.
«Dóńgelek ústel» barysynda qatysýshylar qazirgi zamanǵy jýrnalistikanyń negizgi problemalyq máselelerin talqylady.
Is-sharaǵa «Forbes Kazakhstan» baspageri Armanjan Baitasov, «Almaty» telearnasynyń bas direktory Nurjan Muhamedjanova, «Business FM» radiostantsiiasynyń bas direktory Rýstam Maqsutov, «Inbusiness.kz» aqparattyq agenttiginiń direktory Mira Halina, qurmetti sýdia, zańger Baqytjan Jaqypov, ál-Farabi atyndaǵy Qazaq ulttyq ýniversitetiniń professory Qalimash Begalinova jáne basqalary qatysty.
