Foto: 7-su.kz
Biken Rimova atyndaǵy Taldyqorǵan drama teatrynda «Medal» spektakli júrip jatyr. Bul qoiylymdaǵy Shámshi Qaldaiaqov beinesi, Baýyrjan Momyshulynyń dańqy men ataǵy aishyqtalǵan tus rejisserlik sheshim arqasynda kórinis berdi ári kórermenge laiyqty áser etýde, dep habarlaidy Ult.kz.
Qazaq ádebietine aishyqty qoltańbasymen kelgen Qanat Tileýhannyń «Medal» áńgimesi jelisinde sahnalanǵan spektakl zamannyń únin, zańǵarlardyń demin, qoǵamnyń kúiin ashyq kórsetkendei.
Bizdiń qoǵamda myńdaǵan tulǵa ultynyń tanymy úshin tynbai etken eńbegi laiyqty baǵasyn ala almady. Kerisinshe, jaýyn-jaýynnyń arasynda kún keship, ulttyń qundylyǵyn emes, qulqynnyń qomdylyǵyn oilaǵandar keýdesinde medal jarqyratyp taǵyp, marapatqa ie boldy. «Medal» spektaklinde osyny kóre alamyz.
Foto: kitap.kz
«Adam ózgeshe kúide bolady. Óitkeni seniń jazǵan jazǵan obrazdaryń, keiipkerlerińdi sahnadan kórý, ár akter ózinshe beredi. Ózinshe damytady. Osy Biken Rimova teatrynyń akterlary avtor men rejisserdiń oiyn ármen qarai jetkizip, birlesken avtor retinde ózderin kórsete aldy dep oilaimyn. Óitkeni ár keiipker, ár obraz jetile túsken, qashala túsken, shyńdala túsken. Osy jaǵynan akterler quramyna óte rizamyn. Bul búgingi qoǵamdaǵy bar nárse. Osyny farsqa ainaldyrý, mazaqqa ainaldyrý, kúlkige ainaldyrý, osynyń bári iske asqan. Jalpy bir marapat, madaq degen, maqtan degen nárse adamnyń boiynda bar qasietter ǵoi. Biraq osy madaqpen, marapatpen, osy medalmen de adamdy qorlaýǵa bolady. Adamdy masqaralaýǵa bolady. Ol tek marapattaý emes, onymen qorlaidy da. Osy spektaklde osy nárseni kórdim», – deidi Qanat Tileýhan.
Qoǵamnyń teńsizdigin, jónsizdigin shyǵarmasyna arqaý etken Qanat Tileýhannyń «Medal» áńgimesi jaqsy sahnalandy. Belgili rejisser Farhat Moldaǵalidiń sahnalaýymen kórermenge jol tartqan qoiylymda qarapaiym aýyl muǵaliminiń taǵdyrynan bastap, el úshin eńbek etken tulǵalardyń ómirinen de syr shertiledi. Aqsha úshin ataq satqan, medal jasap shyǵarǵandardyń da, sol ataqqa qumar jandardyń da dalbasa háli laiyqty bederlenip, sheber sýrettelgen.
