Eńbek jáne halyqty áleýmettik qorǵaý ministrligi Eńbek resýrstary ortalyǵynyń prezidenti Dáýlet Arǵandyqov McDonald’s Qazaqstannan ketse, eńbek naryǵyna qalai áser etetini týraly pikir bildirdi, dep habarlaidy QazAqparat agenttigi.
«Qazaqstandaǵy eńbek naryǵynyń syiymdylyǵy edáýir úlken jáne mamandardyń jumys aýystyrýy úzdiksiz júrip jatady. Bizde jylyna orta eseppen 2 millionǵa jýyq adam jumys ornyn aýystyrady. Iaǵni, búgingi tańda qyzmet kórsetý salasy mamandarynyń jumysqa ornalasý múmkindigi bar. Bul sala onsyz da mamandar kóp aýysady. Demek, eńbek naryǵyna («McDonald’s-tyń ketýinen - red) sonshalyq úlken qaýip joq. Qyzmetkerler jumyssyz qalǵannyń ózinde naryq olardy tabiǵi jolmen sińirip alady», - dedi ortalyq prezidenti.
Sondai-aq ol aiaq astynan jumyssyz qalǵandarǵa elektrondy eńbek birjasyna (enbek.kz.) júginýdi usyndy.
«Búgingi tańda bul birjada 100 myńǵa deiin bos jumys orny bar. Resýrsta orta eseppen jylyna 800 myń bos jumys orny jáne 600 myń túiindeme jariialanady. Bos jumys oryndaryn tek jumyspen qamtý ortalyqtary ǵana ornalastyrmaidy. Habarlandyrýlardyń 70% jumys berýshilerdiń ózderi shyǵarady. Sonymen qatar azamattarǵa óz biliktiligin únemi arttyryp otyrý kerek der edim», - dedi Dáýlet Arǵandyqov.
