Búgin Parlament Májilisiniń jalpy otyrysynda palatanyń Halyqaralyq ister, qorǵanys jáne qaýipsizdik komitetine jańa tóraǵa sailandy, dep habarlaidy QazAqparat.
«Ózderińizge belgili, qazirgi ýaqytta Halyqaralyq ister, qorǵanys jáne qaýipsizdik komiteti tóraǵasynyń orny bos. Osyǵan bailanysty zańnamaǵa sáikes, bos orynǵa depýtat Muhtar Tildábekuly Ermannyń kandidatýrasyn usynamyn. Muhtar Tildábekulyn barlyqtaryńyz jaqsy bilesizder, osy komitettiń múshesi. Shet tilderin jaqsy meńgergen bilimdi ári tájiribeli depýtat. Kóptegen mańyzdy zańdardyń qabyldanýyna zor úles qosqan», - dedi Májilis tóraǵasy Nurlan Nyǵmatýlin.
Esterińizge sala keteiik, osyǵan deiin atalǵan komitetke Máýlen Áshimbaev tóraǵalyq etken bolatyn. Jaqynda ol «Nur Otan» partiiasy Tóraǵasynyń Birinshi orynbasary qyzmetine bekitilgennen keiin, Májilistiń Halyqaralyq ister, qorǵanys jáne qaýipsizdik komiteti tóraǵasy laýazymynyń orny bos boldy.
Erman Muhtar Tildábekuly1963 jyly Ońtústik Qazaqstan oblysy Qyzylqum aýdany «Temir» keńsharynda týǵan. S.M. Kirov atyndaǵy Qazaq memlekettik ýniversitetin (1986) bitirgen. Tarihshy, shetel tilinde oqytatyn tarih pániniń oqytýshysy. Ál-Farabi atyndaǵy Qazaq ulttyq ýniversiteti (1998), zańger. Eńbek qyzmetin 1986 jyly Almaty sáýlet-qurylys institýtynyń assistenti, tálimgeri bolyp bastady. 1993-1999 «Iashar holding» kompaniiasynyń óńirlik menedjeri, Almaty q. 1999-2005 «Almatyjarnama» MK direktory, Almaty q. 2005-2006 «Asar» respýblikalyq partiiasy» RQB Ortalyq apparaty hatshysynyń orynbasary, hatshysy, Almaty q. 2006-2008 «Nur Otan» partiiasy Ortalyq apparaty basshysynyń orynbasary, Astana q. 03.2008-11.2008 «Nur Otan» HDP Ortalyq apparatynyń hatshysy, Astana q. 2008-2013 «Nur Otan» HDP Ortalyq apparaty basshysynyń orynbasary, Astana q. 2013-2014 «Evraziia» birinshi arnasy» JShS bas direktorynyń birinshi orynbasary, Astana q. 2014-2016 QR Parlamentiniń Májilisindegi «Nur Otan» partiiasy fraktsiiasy apparatynyń basshysy, Astana q. 2016 jyldan bastap - altynshy sailanǵan QR Parlamenti Májilisiniń depýtaty, QR Parlamentiniń Májilisindegi «Nur Otan» partiiasy fraktsiiasynyń múshesi.
«Qurmet» ordenimen, «Eren eńbegi úshin», «Qazaqstan Respýblikasynyń táýelsizdigine 10 jyl», «Qazaqstan Respýblikasynyń táýelsizdigine 20 jyl», «10 jyl Astana» medaldarymen marapattalǵan.
