Búgin Parlament Májilisinde spiker Erlan Qoshanovtyń tóraǵalyǵymen «Amanat» partiiasy fraktsiiasynyń otyrysy ótti, dep habarlaidy QazAqparat.
Onda saiasi uiymnyń 2022 jylǵy 1 naýryzda ótken kezekten tys HHII sezinde El Prezidenti, Partiia Tóraǵasy Q.K.Toqaev alǵa qoiǵan jańa mindetterdi júzege asyrý máseleleri qaraldy.
Erlan Qoshanov sezdiń tarihi mánine toqtalyp, «Amanat» partiiasy qyzmetin transformatsiialaý aiasynda depýtattardyń jumysyn jandandyrýdyń mańyzyn atap ótti. Negizgi maqsat – qoǵam suranysyna der kezinde jaýap berý jáne azamattardyń naqty máselelerin sheshý. Nátijesinde ol jańa saiasi jaǵdaida sailaýshylardyń «Amanat» partiiasyna degen senimin arttyrýǵa septigin tigizedi.
Depýtattar jumysyndaǵy jańa tásilderdi talqylai kele, Májilis Spikeri halyqtyń naqty problemalaryn sheshý úshin Úkimetpen birlese jumys atqarýdyń mańyzdylyǵyn aitty. Depýtattarǵa bul iske Úkimetten bir Vitse-premerdiń bekitilgeni jóninde aqparat berildi. Ol depýtattardyń saýaldarynda kóterilgen máselelerdi sheshý boiynsha júieli túrde jumys isteitin bolady.
«Memleket basshysy azamattardyń múddesin qorǵaý basty maqsat ekenin naqty aitty. Biz óńirlerde qozǵalǵan birqatar ózekti máselelerdi toptastyrdyq. Men ony fraktsiia Prezidiýmyna bir júiege keltirip, Úkimetke joldaýdy tapsyrdym. Odan keiin Úkimetpen birlesken is-sharalar ótkizip, sol máselelerdi sheshý úshin árqaisysyn jeke-jeke talqylaimyz. Bul BAQ ókilderiniń qatysýymen ashyq ótetin bolady», – dedi Erlan Qoshanov.
Sonymen qatar fraktsiia basshysy depýtattardy halyqty tolǵandyratyn máseleler boiynsha sailaýshylarmen keri bailanys ornatý úshin áleýmettik jeliler men buqaralyq aqparat quraldarynyń múmkindikterin belsendi paidalanýǵa shaqyrdy. Ásirese, jumys barysynda áleýmettik zertteýlerdi keńinen paidalaný, asa mańyzdy áleýmettik-ekonomikalyq máseleler, sonyń ishinde azamattardyń shaǵymdary boiynsha ózekti statistikalyq derekterdi alý úshin Úkimettiń Tsifrlyq keńsesimen ózara is-qimyldy kúsheitý, partiianyń sailaýaldy ýádelerin oryndaý úshin Jol kartasynyń iske asyrylýyn depýtattyq baqylaýǵa alý.
Sondai-aq fraktsiia otyrysynda depýtattar óńirlerdegi halyqtyń naqty máselelerine shuǵyl jaýap berý joldaryn qarastyryp, jastardy qoldaýǵa baǵyttalǵan birqatar mańyzdy jobalardy talqylady.
Otyrys barysynda Májilis komitetteri janynan qoǵamda, sonyń ishinde jańa mediada kóterilip jatqan ózekti máseleler boiynsha turaqty jumys isteitin sarapshylar alańdaryn qurý týraly sheshim qabyldandy. Barlyq kezdesýler onlain rejiminde ótip, sarapshylar men BAQ ókilderi osy dialog alańdarynyń turaqty qatysýshylaryna ainalýy kerek.
Fraktsiia otyrysynda vitse-spiker, fraktsiia basshysynyń orynbasary P.Kazantsev, depýtattar S.Nurbek, E.Jańbyrshin, E.Smyshliaeva, Iu.Kýchinskaia, E.Bisembaev, E.Saiyrov sóz sóiledi. Baiandamashylar partiia basshylyǵy júktegen mindetterge sáikes fraktsiia depýtattarynyń jumysyn jandandyrý jaily oi-pikirlerimen bólisti.
