Májilistiń jalpy otyrysynda depýtat Erlik Ómirǵali jas otbasylardy baspanamen qamtamasyz etýge qatysty usynysyn jariialady, dep habarlaidy "Ult aqparat".
«Halyqtyń áleýmettik toptaryn turǵyn úimen qamtamasyz etý maqsatynda Úkimet birneshe baǵyttar boiynsha turǵyn úimen qamtamasyz etýge arnalǵan memlekettik baǵdarlamalardy iske asyrýda. Osy oraida «Aq jol» fraktsiiasy jas otbasylardy qoldaý men bala týýdy yntalandyrýdy asa mańyzdy dep sanaidy. Qazirgi halyq tyǵyzdyǵy bir sharshy shaqyrymǵa 6-7 adamnan keledi, demografiia ulttyq qaýipsizdik pen aýmaqtyq tutastyqta mańyzdylyqqa ie. Budan basqa, keibir baǵalaýlar boiynsha, aýmaq resýrstarynyń tolyqqandy jumys isteýi úshin Qazaqstannyń shamamen 60 mln halqy bolýy qajet. Eger de (1920-30 jyldardaǵy) ótken ǵasyrdaǵy asharshylyq jyldarynda qazaqtar san myńdap qyrylmaǵanda, bizde halyq sany osy shamada bolar edi. Memlekettik baǵdarlamalar bul máseleniń mańyzdylyǵyn baǵalamaidy dep sanaimyz», - dedi Erlik Ómirǵali «Aq jol» fraktsiiasynyń depýtattyq saýalyn vitse-premer Roman Skliardyń atyna joldai otyryp.
Onyń aitýynsha, 2020-2025 jyldarǵa arnalǵan «Nurly jer» turǵyn úi-kommýnaldyq damý baǵdarlamasy iske asyrylyp jatyr. Biraq ol ákimdikterde kezekte turǵandarǵa ǵana qoldanylady.
«Otbasyn jańadan qurǵan, qol-aiaǵy saý, biraq áli óz baspanasyna qarajat jinap úlgermegen jastar ne isteýi kerek? Olar qashan balaly bolady? Kópbalaly otbasylar qaidan paida bolsyn? Qazirgi jaǵdaida Úkimet qoldamasa nemese jaǵdaiy bar ata-analary bolmasa, jas otbasylarda páter alýǵa múmkinshiligi joq. Olar páterge aqsha jinap bolǵanda jastary 40-tan asyp qalady, bul jasta kóp bala týa almaisyń. Osy ýaqytqa deiin genetika da nasharlady. Dárigerlerdiń aitýynsha, erler men áielderdiń úshten biri 40 jastan keiin jáne odan da erterek bedeýlikke ushyraidy», - dep toqtaldy depýtat.
«Tuńǵysh Prezident Nursultan Nazarbaevtyń tapsyrmasy boiynsha qabyldanǵan 7-20-25 baǵdarlamasy jas otbasylarǵa belgili bir qoldaý kórsetti. Osy baǵdarlama turǵyn úi qurylysyn iske asyrý jáne osy sektorǵa jeke investitsiialardy tartýǵa serpin berdi. Biraq jaqynda ǵana osy jáne basqa baǵdarlamalardy toqtatý týraly aityldy, bul habar óte túsiniksiz reaktsiiaǵa negiz boldy. Osyǵan bailanysty, «Aq jol» demokratiialyq partiiasy jas otbasylar úshin ár bala týǵan kezde 25 paiyz mólsherinde ipotekalyq kreditter boiynsha paiyzdyq mólsherlemelerdi sýbsidiialaýdy engizý týraly 2013 jylda aitylǵan usynysyna qaita oralady. Paiyzdyq mólsherlemelerdi sýbsidiialaý biznesti kreditteý kezinde memlekettik jáne jeke múddelerdi ushtastyrý quraly retinde ózin jaqsy jaǵynan kórsetti. Bul tabysty tájiribeni áleýmettik baǵdarlamalarǵa da taratý kerek dep sanaimyz. Sonda eki balasy bar otbasy mólsherlemeniń jartysyn tóleidi, al úlken otbasy, kútilgendei paiyzsyz baspana alady. Bul qadam jas otbasylardy birden balaly bolýǵa yntalandyrýǵa múmkindik beredi, al ekinshi deńgeidegi bankter ipotekany belsendi túrde kreditteýge múmkindik alady», - dedi Erlik Ómirǵali.
Onyń paiymynsha, eger sýbsidiialar múmkin bolsa, jas otbasylar eń bolmaǵanda birinshi kezeńde nesie tóleý úshin jumys isteýge jáne aqsha tabýǵa tyrysady, sondai-aq bala týǵan saiyn otbasylyq biýdjetke júkteme azaiady. Qazirgi tájiribeniń ornyna, usynylyp otyrǵan bul tásil turǵyn úige bola ajyrasý jaǵdailary órship bara jatqan sátte otbasy institýtyn nyǵaitady.
