Májilis depýtaty Elnur Beisenbaev baspana kezeginde turǵandar eleýli túrde artqanyn aitty. Osy oraida ol Úkimet basshysy Álihan Smailovtyń atyna depýtattyq saýal joldady, dep habarlaidy QazAqparat.
«Elimizde ár azamattyń áleýmettik jaǵdaiy baspanasynyń bolýymen bailanysty ekeni belgili. Respýblikamyz boiynsha sońǵy jyldary bul másele edáýir kúrdelenip keledi. Jyldar boiy kezekte turǵan áleýmettik osal toptar sanatynyń ókilderi úi alý múmkindigine senimsizdik bildirýde. Mysaly, 2018 jyldan beri kezekte turǵan adamdardyń tizimi shamamen 130 myńǵa kóbeiip, 591 myń tirkelýshini qurap otyr. Onyń ishinde, olardyń sany Shymkentte 14 myńǵa ósip, 48 442 adam bolsa, Almaty oblysyndaǵy úi kezegin kútýshilerdiń sany 17 myńǵa ósip, 59 067-ge jetti. Al Túrkistan oblysynda kezektegi san 19 myńǵa artty. Bul tsifrlar tek ósýmen bolsa, páter jaldaǵan otbasylar kóshýmen álek», - dedi E. Beisenbaev májilistiń jalpy otyrysynda.
Onyń aitýynsha, 591 myńnan astam kezekte turǵan adamnyń 170 myńǵa jýyǵynyń jan basyna shaqqandaǵy tabysy kúnkóris deńgeiinen tómen, iaǵni kedeishiliktiń shyńyraý sheginde ekeniniń dáleli. Aita ketetini, bul sanattaǵy kópshilikti – I, II toptaǵy múgedekter, erekshe balalardy asyraýshy otbasylar, jetimder, kópbalaly otbasylar quraidy.
«Memleket basshysy 2020 jyldyń basyna deiin «Baqytty otbasy» baǵdarlamasynyń aýqymyn keńeitýdi tapsyrǵan bolatyn. Al Úkimet bolsa, tek qarjyny ulǵaitýmen shekteldi. Osy oraida, áleýmettik osal toptarǵa kiretin jetimder men múgedekter sanaty qaita syrtta qalyp qoidy. Sonymen qatar, «Shańyraq» baǵdarlamasyna arnalǵan qarjy áli ortaq operatorǵa úilestirilmegen. Úkimet úshin bir ai ýaqyt emes shyǵar, al páter jaldaýshy úisiz otandasymyzǵa bul kezekti dalaǵa ketken páteraqysynyń somasy», - dedi depýtat.
Osy oraida ol Úkimet tarapynan daiarlanyp jatqan «Turǵyn úi saiasaty» týraly zańnamanyń jobasyna tiisti usynystardy eskere kele, naqty sheshimder tizbegin qarastyrýdy surady.
