Búgin Májilistiń Ekologiia máseleleri jáne tabiǵat paidalaný komitetiniń otyrysy ótip, onda Qazaqstan Respýblikasy Tótenshe jaǵdailar ministri qyzmetine taǵaiyndaý úshin Iýrii Ilinniń kandidatýrasy kelisildi. Bul týraly Májilistiń baspasóz qyzmeti habarlady.
Jýyrda ǵana Memleket Basshysy Qasym-Jomart Toqaev Qazaqstan halqyna joldaýynda Tótenshe jaǵdailar ministrligin qaita qurýdy tapsyrǵan bolatyn. Osyǵan orai, «Qazaqstan Respýblikasynyń Parlamenti jáne onyń depýtattarynyń mártebesi týraly» Konstitýtsiialyq zańnyń 22-1 babyna sáikes, Iýrii Ilinniń kandidatýrasy Májilistiń beiindi komitetine usynyldy.
Aǵymdaǵy sessiiada Májiliste engizilgen ministrlerdi kelisýdiń jańa nysanyna sáikes, Iýrii Ilin depýtattardyń suraqtaryna jaýap berip, óziniń jumysyn uiymdastyrý týraly oi-pikirin jetkizdi.
Atap aitqanda, depýtattar «Kazaviaspas» qyzmeti, tótenshe jaǵdailar týraly eskertýdiń dáiektiligin arttyrý, belsendi sharalardy ázirleý, óndiristik, munai, jarylý qaýpi joǵary kásiporyndarda órt qaýipsizdigin qamtamasyz etý boiynsha jumystardyń tiimdiligin arttyrý máselelerin kóterdi.
Sonymen birge Májilis depýtattary Palatanyń qaraýynda jatqan zań jobalary boiynsha depýtattyq korpýspen jedel ózara jumys isteýdiń qajettiligine nazar aýdardy.
Komitet otyrysynyń nátijesi boiynsha tiisti Qorytyndy qabyldandy. Qujatta Májilistiń Ekologiia máseleleri jáne tabiǵat paidalaný komiteti Ilin Iýrii Viktorovichtyń kandidatýrasyn qarai otyryp, ony Qazaqstan Respýblikasynyń Tótenshe jaǵdailar ministri qyzmetine taǵaiyndaýǵa usynýǵa bolady dep sanaidy.
