Májiliste «Qazaqstan Respýblikasynyń keibir zańnamalyq aktilerine tótenshe jaǵdai máseleleri boiynsha ózgerister engizý týraly» zań jobasy talqylanýda, dep habarlaidy "Ult aqparat" tómengi palatanyń baspasóz qyzmetine silteme jasap.
Daǵdarysqa qarsy negizgi zańnamalyq túzetýlerdi talqylaý Májilis depýtattary, memlekettik organdar men «Atameken» UKP ókilderiniń qatysýymen beinekonferentsiia formatynda ótýde. Zań jobasy «Áleýmettik-ekonomikalyq turaqtylyqty qamtamasyz etý jónindegi sharalar týraly» Qazaqstan Respýblikasy Prezidentiniń 2020 jylǵy 16 naýryzdaǵy Jarlyǵyn oryndaý maqsatynda ázirlendi jáne qazirgi ýaqytta elimizde tótenshe jaǵdaidy engizýmen tikelei bailanysty. Ulttyq ekonomika vitse-ministri Aigúl Shaimovanyń aitýynsha, bul zań joba tótenshe jaǵdai kezinde basqarý sheshimderin qabyldaý úshin qajetti shara bolyp tabylady.
Atap aitqanda, Qazaqstan Respýblikasy Prezidentiniń aktilerine sáikes tótenshe jaǵdai kezinde eldiń ekonomikalyq qaýipsizdigin qamtamasyz etý úshin mańyzdy qujattardyń qoldaný erekshelikteri belgilenýi múmkin. Olar: salyq, banktik, biýdjettik, kedendik, eńbek, monopoliiaǵa qarsy zańdar, sondai-aq halyqtyn densaýlyǵyn saqtaý týraly jáne densaýlyq saqtaý júiesi týraly zańnamalar, memlekettik satyp alý týraly, valiýtalyq retteý týraly zańnamalar, azamattardy áleýmettik qorǵaý, memlekettik menshik salalary jáne t.b.
Sonymen qatar, A.Shaimovanyń aitýynsha, tótenshe jaǵdai kezinde jumys jaǵdaiyndaǵy qalyptasqan tájiribeni eskere otyryp, Úkimet qosymsha zańnamalyq sharalar paketin engizedi. Qaraýǵa kelip túsken zań jobasynda «Tótenshe jaǵdai týraly» jáne «Normativtik quqyqtyq aktiler týraly» zańdarǵa tótenshe jaǵdai engizý kezinde qoldanylatyn negizgi sharalar men ýaqytsha shekteýlermen bailanysty tolyqtyrýlar bóliginde túzetýler usynylyp otyr.
Zań jobasyn talqylaý odan ári Májilistiń Ekonomikalyq reforma jáne óńirlik damý komitetiniń tóraǵasy Nurtai Sabilianov bastaǵan jumys tobynda jalǵasýda.
