Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine salyq salý jáne investitsiialyq ahýaldy jetildirý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Zań jobasynyń mańyzdy baǵyttary retinde salyq júiesin reformalaý, salyqtyq jáne kedendik ákimshilendirýdi jetildirý, investitsiialar tartýdy yntalandyrý, biznes-ortany damytý, tariftik saiasatty jáne monopoliiaǵa qarsy retteýdi jetildirý jáne basqa shalar eskerilgen.
«Júrgizilgen tsifrlandyrý men júielerdi jańǵyrtýdy eskere otyryp, qoldanystaǵy rásimder qaita qaraldy. Memlekettik qyzmetter boiynsha elektrondyq formatqa aýystyrý, olardy kórsetý merzimderin qysqartý, jeke praktikamen ainalysatyn tulǵalardyń qyzmetin toqtatý rásimin ońtailandyrý usynylady. Salyq eseptiligin tapsyrý múmkindigi keńeitilip, endi ony bir rettik paroldi paidalaný arqyly usynýǵa bolady», - dedi Ulttyq ekonomika ministri Rýslan Dálenov.
Budan buryn habarlanǵandai, salyq elementterin (salyq salý obektisi, salyq bazasy, mólsherlemesin, esepteý jáne tóleý tártibin) ózgertpei jeke tulǵalardyń múlik jáne jer salyqtaryn biriktirý usynylady, 2 salyq biryńǵai tólemmen tólenedi.
Bul rette, kóppáterli turǵyn úilerdiń ieleri úshin jer salyǵyn alyp tastaý usynylady.
R.Dálenovtyń sózine qaraǵanda, salyq tóleýshilerge qolaily bolý maqsatynda kólik salyǵyn tóleý merzimin biylǵy 31 jeltoqsanynan kelesi jyldyń 1 sáýirine aýystyrý usynylyp otyr.
Budan bólek, turaqty áleýmettik mańyzy bar avtomobil tasymaldary boiynsha qosylǵan qun salyǵynan 3 jylǵa bosatý eskerilip otyr.
«5G jańa bailanys túrin qurýǵa investitsiialar tartý jáne jasandy intellektini damytý maqsatynda radiojiilik spektrin paidalanǵany úshin tólemaqy mólsherlemelerin 5 jyl merzimine 10 esege deiin tómendetý usynylady», - dedi Rýslan Dálenov.
