Parlament Májilisiniń jalpy otyrysynda qazaq tili terminologiiasy salasy boiynsha máseleler kóterildi, dep habarlaidy "Ult aqparat".
«Prezident alǵa qoiǵan osy mańyzdy mindetti oryndaý maqsatynda, eń aldymen, qazaq tilindegi terminderdi qalyptastyrý protsesin jetildirý jáne olardy birizdendirý qajet. Bul rette ótken jyly Parlament Májilisinde «Rýhani jańǵyrý» baǵdarlamasyn júzege asyrý aiasynda terminologiianyń ózekti máselelerin talqylaýǵa arnalǵan ǵylymi-praktikalyq konferentsiia ótkizilip, onyń qorytyndysy boiynsha Úkimetke tiisti usynymdar joldanǵan bolatyn. Alaida, qazirgi qazaq tili terminologiiasy salasyndaǵy kózge uryp turǵan kemshilikter áli de tolyq túzetilmei, qoǵam tarapynan oryndy synǵa ushyrap júr. Úkimet janyndaǵy Respýblikalyq terminologiia komissiiasy bekitken terminderdiń ishinde kóńilge qonbaityn aýdarmalar az emes. Máselen, orys tilindegi «gostinitsa» termininiń qazaq tilinde úsh túrli ataýy bar: «meimanhana», «qonaqúi», «qonaq úii»», - dedi depýtat Káribai Musyrman Úkimet basshysynyń orynbasary Eraly Toǵjanovtyń atyna joldaǵan depýtattyq saýalynda.
Onyń paiymynsha, osyndai olqylyqtyń oryn alýynyń úsh sebebi bar.
Birinshiden, Respýblikalyq terminologiia komissiiasynyń quramyna til máselelerimen ainalysatyn memlekettik qyzmetshiler, filologtar, aýdarmashylar, jýrnalist-jazýshylar engizilgen. Olardyń arasynda meditsinadan basqa, áleýmettik jáne ekonomikalyq salalardyń mamandary joq.
«Ekinshiden, osy komissiianyń jumysyna ashyqtyq jetispeidi. Úshinshiden, onyń qabyldaǵan terminderi usynymdyqqa sipatqa ie, iaǵni olardy qoldaný mindetti emes», - dedi depýtat.
Osy oraida ol depýtattyq saýal aiasynda tiisti usynystardy engizdi.
«Respýblikalyq terminologiia komissiiasynyń mártebesin qaita qaraý jáne ol bekitken terminderdiń memlekettik organdarda, menshik túrine qaramastan, kásiporyndar men uiymdardyń barlyǵynda, qoǵamdyq birlestikterde is qaǵazdaryn júrgizýde, bilim berý uiymdarynyń oqý baǵdarlamalarynda, kórneki jarnamada burmalanbai, birizdi qoldanylýyn qamtamasyz etýge baǵyttalǵan normativtik-quqyqtyq aktilerdi qabyldaý qajet. Atalǵan komissiianyń quramyn áleýmettik jáne ekonomikalyq salalardyń tájiribeli mamandarymen, belgili sarapshy-ǵalymdarmen, úkimettik emes uiymdardyń ári ziialy qaýymnyń ókilderimen tolyqtyrǵan jón», - dedi K. Musyrman.
Onyń aitýynsha, Respýblikalyq terminologiia komissiiasynda qaralatyn terminderdiń jobalary osy komissiianyń resmi saitynda ǵana emes, qazaqtildi respýblikalyq gazetter men áleýmettik jelilerde aldyn ala jariialanyp, keń qoǵamdyq talqylaýdan ótkizilgeni jón.
