Foto: gov.kz.
Parlament Palatalarynyń birlesken otyrysynda «Qazaqstan Respýblikasynyń Prezidenti týraly» Konstitýtsiialyq zań jobasy qaraldy. Bul týraly Únzila Shapaq baiandama jasady, dep habarlaidy Ult.kz.
Depýtattyń aitýynsha, zań jobasy Konstitýtsiialyq reformanyń negizgi qaǵidattaryn iske asyratyn mańyzdy qujattardyń biri bolyp sanalady.
Joba aiasynda Qazaqstanda Vitse-Prezident institýtyn engizý kózdelip otyr. Qujatta onyń quqyqtyq mártebesi, ókilettigi, taǵaiyndalý tártibi, negizgi fýnktsiialary jáne qyzmetine bailanysty shekteýler zańnamalyq túrde bekitiledi.
Únzila Shapaq álemniń birqatar elderinde Vitse-Prezident laýazymy bar ekenin atap ótti. Atap aitqanda, mundai institýt AQSh, Túrkiia, Bolgariia, Úndistan, Filippin jáne Latyn Amerikasynyń birqatar memleketterinde jumys isteidi.
«Ártúrli elderde Vitse-Prezidenttiń ókilettigi saiasi júiege jáne basqarý modeline bailanysty erekshelenedi. Biraq onyń ortaq róli – memlekettik biliktiń sabaqtastyǵyn qamtamasyz etý», – dedi ol.
Baiandamada Vitse-Prezident institýty engizilgen jaǵdaida memlekettegi saiasi turaqtylyq pen basqarý júiesiniń úzdiksizdigi kúsheietini aityldy. Ol memlekettik basqarýdaǵy ekinshi tulǵa retinde júieniń turaqty jumysyn qamtamasyz etýge baǵyttalady.
Sonymen qatar, jańa laýazym basqarýshylyq júktemeni bólisýge jáne memlekettik saiasattyń úzdiksiz oryndalýyn qamtamasyz etýge múmkindik beretini atap ótildi.
Sóz sońynda depýtat zań jobasyn birinshi oqylymda qoldaýdy surady.
