Parlament Májilisiniń jalpy otyrysynda depýtat Elnur Beisenbaev internet-kazino qyzmetine tosqaýyl qoiýǵa qatysty usynystar aitty, dep habarlaidy QazAqparat.
«Qazaqstan Respýblikasynyń «Oiyn biznesi týraly» Zańyna sáikes, elektrondy jáne internet-kazino qyzmetine tyiym salynsa, «Jarnama týraly» Zańyna sáikes bul oiyndar túrin jarnamalaýǵa da ruqsat joq. Sondai-aq, oiyn biznesiniń arnaiy aimaqtarǵa kóshirilýine qaramastan, halyq arasynda, onyń ishinde jastardyń internet-kazinolar usynatyn qumar oiyndar men bás tigýge qyzyǵýshylyǵy kúnnen-kúnge artýda. Dálel retinde, Qazaqstannyń zańnamasyna sáikes, 2020 jyly qumar oiyndar men bás tigýdiń teris áserin azaitý maqsatynda azamattar úshin osyndai oiyndarǵa qatysýdan óz betinshe shekteý múmkindigi engizilgen. Degenmen, zań qabyldanǵan sátten bastap bir jarym jyl ishinde tizimge 430-dan astam adam tirkelse, olardyń 50 protsentin 30 jasqa tolmaǵan jastarymyz qurap otyr. Bul derttiń shyrmaýynda jas órenderimizdiń kóp ekendigin ańǵartady», - dedi depýtat Úkimet basshysynyń orynbasary Eraly Toǵjanovtyń atyna joldaǵan saýalynda.
Onyń aitýynsha, búginde internette ońai tabys ákelýdi kórsetetin ártúrli onlain-kazinolar men býkmekerlik keńselerdiń agressivti jarnamasynyń kólemi aitarlyqtai ósti.
«Onlain-kazinolar tairańdap júrgende, otbasylardyń oirandalyp jatqandyǵy barshamyzǵa aian. Zertteýlerdiń nátijeleri boiynsha internet betterinde qaptaǵan qumar oiyndardyń tozaǵyna elimizdiń árbir onynshy otbasy ilinedi eken. Tiisti memlekettik organnyń málimetinshe, 2021 jyldyń basynan bastap internet-kazino qyzmetine jáne jarnamasyna bailanysty zań buzýshylyqtar boiynsha 2 myńnan astam internet saittarynyń jumysyna shekteý qoiylǵan. Alaida, bul buǵattaý boiynsha sharalar onlain-kazino sanynyń azaiýyna alyp kelmeidi, óitkeni buǵattaýdan keiin jańa saittar qurylady. Zańdyq tetikterdiń barlyq múmkindikterine qaramastan, tiisti memlekettik organdar tarapynan internet-kazinolardyń qyzmetine qarsy is-qimyl sharalaryn jetkiliksiz rettelýde dep esepteimiz», - dedi Elnur Beisenbaev.
Onyń aitýynsha, halyqaralyq tájiribe boiynsha Amerikanyń kóptegen shtattarynda 2006 jyldan beri internet-kazino qyzmetine tyiym salynǵan jáne qarjy uiymdary internet-kazinoǵa bás tigý jasaityn azamattardyń shottaryna qyzmet kórsete almaidy. Al, Qytai aýmaǵynda úkimet internet-kazinolar men býkmekerlik keńselerdiń saittaryn ǵana emes, sondai-aq atalǵan saittardy jarnamalaityn resýrstardy da buǵattaý boiynsha júieli sharalar qabyldaýda.
Osyǵan bailanysty ol jaýapty memlekettik organdardan internet-kazinonyń qyzmetine qarsy is-qimyl jasaý boiynsha sharalardy kúsheitýdi surady:
- internet-kazinolarda jáne býkmekerlik keńselerde tólemderdi kredittik kartalardyń kómegimen toltyrýǵa tyiym salýdy qarastyrýdy (bul kartalar kredittik, iaǵni paiyzdyq mólsherlemesi joǵary);
- Qazaqstan Respýblikasy zańnamasynyń talaptaryn buza otyryp, qumar oiyndardy uiymdastyrý, ótkizý jónindegi qyzmetti júzege asyryp kelgen sheteldik uiymdastyrýshylardyń arnaiy tizbesin ázirleý usynyldy.
