Búgin Májiliste Palata cpikeri Nurlan Nyǵmatýlinnniń tóraǵalyǵymen «Qazaqstan Respýblikasynda beibit jinalystardy uiymdastyrý jáne ótkizý tártibi týraly» zań jobasyna qatysty dóńgelek ústel otyrysy ótti. Bul týraly "Ult aqparat" Májilistiń baspasóz qyzmetine silteme jasap habarlaidy.
Prezidenttiń bastamasymen elde tótenshe jaǵdai jariialanýyna bailanysty dóńgelek ústel 9 aimaqpen beine bailanys formatynda uiymdastyryldy.
Oǵan depýtattarmen qatar, memlekettik organ basshylary, Májiliske kirmegen saiasi partiialar, qoǵamdyq jáne memlekettik emes uiym músheleri, aqparat quraldary ókilderi qatysty.
Alǵy sóz alǵan Májilis Tóraǵasy bul qujat elimiz úshin óte mańyzdy ekenin aita kelip, Memleket basshysy Qasym-Jomart Kemeluly Toqaev Qazaqstan halqyna Joldaýynda mitingter týraly zańdy jetildirý týraly tapsyrma bergenin atap ótti. Osyǵan orai, ázirlengen zań jobasy qoǵamdyq deńgeide uzaq talqylanyp, Májilis qaraýyna engizildi. Búginde jumys toby belsendi iske kirisken.
Dóńgelek ústelde zań jobasynyń halyq arasynda pikirtalas týdyrǵan normalaryna basa nazar aýdaryldy. Máselen, beibit jinalystardy uiymdastyrý men ótkizý oryndaryna qatysty suraqqa kelgende Májilis Spikeri, barlyq damyǵan elderde miting, jiyn, sherý basqa da beibit jinalystardy ótkizý úshin arnaiy talap baryn aitty. Mysaly, jinalysty uiymdastyrýshylar onyń maqsatyn, taqyrybyn aldyn-ala aitý kerek.
Bul álemdik tájiribe. Taqyryp tóńireginde, adam quqyqtary jónindegi ýákil Elvira Azimova, «Qazaqstanda parlamentarizmdi damytý qorynyń» tóraiymy Záýresh Battalova, quqyqqorǵaýshy Evgenii Jovtis, qoǵam qairatkeri Muhtar Taijan, «Qazaqstannyń Azamattyq Aliansy» zańdy tulǵalar birlestiginiń prezidenti Asylbek Qojahmetov basqa da qoǵam belsendileri óz pikirlerin ortaǵa saldy.
N. Nyǵmatýlin bul normany ekinshi oqylymǵa deiin pysyqtaý kerektigin aitty.
Zań jobasynyń pikir týdyrǵan taǵy bir normasy ol ótinishter men habarlandyrýlardy qaraý merzimine bailanysty. Úkimettik jobada mitingter men jinalystardy ótkizý úshin jergilikti atqarýshy organǵa 15 kúnnen keshiktirmei, al ereýil uiymdastyrý úshin 10 kúnnen keshiktirmei habarlandyrý jiberý kerektigi týraly norma bar. Qoǵamdyq ókilder bul merzimdi qysqartý týraly pikirdi alǵa tartty. Májilis Tóraǵasy da osy pikirdi qosta kelip, ekinshi oqylymǵa deiin naqtylaýdy tapsyrdy.
Talqylanyp otyrǵan qujattyń jýrnalisterge qatysty normasynda da pikir alýandyǵy bar. Mitingti jazyp, kórsetý úshin jýrnalisterge qoiylatyn tyiymdar men mindettemeler tizimi narazylyq týdyrǵan.
Májilis Tóraǵasynyń aitýynsha, jýrnalisterdiń quqyqtary men mártebesi qorǵalý kerek. Sebebi, jýrnalisterdi jan-jaqty qoldaǵan kezde ǵana erkin jumys istep, halyqty barlyq aqparatpen qamtamasyz ete alady. Sol úshin jýrnalisterge beibit sherýge qatysýmen qatar, barlyq aqparattarǵa ashyq jáne tez qol jetkizýge múmkindik jasaý kerek.
Dóńgelek ústel barysynda zań jobasynyń basqa da normalaryna qatysty ózekti suraqtar kóterildi. Májilis Tóraǵasy aitylǵan pikirler men usynystardyń barlyǵy ekinshi oqylymǵa deiin jumys tobynda saralanyp, pysyqtalatynyn alǵa tarta kelip, halyqqa qajetti, shynaiy jumys isteitin zań qabyldaý qajettigin aitty.
