Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine dene shynyqtyrý jáne sport máseleleri boiynsha ózgerister men tolyqtyrýlar engizý týraly» zań jobasy maquldandy, dep habarlaidy "Ult aqparat".
Zań jobasy qoldanystaǵy zańnamany buqaralyq sportty damytý jáne halyqty, birinshi kezekte balalardy sportpen ári dene shynyqtyrýmen ainalysýǵa barynsha tartý bóliginde jetildirýge baǵyttalǵan.
«Qujattyń negizgi baǵyttaryna toqtalsaq, ókiletti organnyń quzyretin keńeitý, jergilikti atqarýshy organdardyń quzyretin keńeitý, sporttyq infraqurylymnyń qoljemdiligi, bilim berý salasyndaǵy jańalyqtar qamtylǵan. Ókiletti organnyń quzyreti ulttyq sport túrleri boiynsha tizbeni bekitý qyzmetimen tolyqtyrylady», - dedi Mádeniet jáne sport ministri Aqtoty Raiymqulova.
Jergilikti atqarýshy organdardyń quzyreti kelesi qyzmettermen tolyqtyrylady: dárigerlik-dene shynyqtyrý dispanserleriniń sanyn arttyrý, halyqpen jumys isteý úshin dene shynyqtyrý jáne sport nusqaýshylarymen qamtamasyz etý, aýyl halqy arasyndaǵy dene shynyqtyrý saýyqtyrý qyzmeti, balalar men jasóspirimderge arnalǵan dene shynyqtyrý daiarlyǵy klýbtarynyń jelisin keńeitý.
Sonymen qatar sport infraqurylymynyń qoljemdiligi aiasynda múmkindigi shekteýli jandar men halyqtyń júrip-turýy shekteýli toptaryn qosa alǵanda, olardyń turǵylyqty jeri boiynsha jáne kópshilik demalatyn oryndarda sport nysandarynyń qoljetimdiligin qamtamasyz etý ekerilgen. Turǵyn úi keshenderin salý kezinde múmkindigi shekteýli toptardyń qoljetimdiligin eskere otyryp, sport alańdarymen qamtamasyz etý qajettigi qarastyryldy.
Munymen qosa, bilim berýdiń barlyq deńgeilerindegi dene tárbiesi sabaqtarynda ulttyq sport túrleriniń quramdasyn engizý nazarǵa alyndy.
«Barlyq jas sanattary arasynda dene shynyqtyrýmen jáne sportpen ainalysatyn halyqtyń qamtýyn 45 paiyzǵa deiin ulǵaitý, óskeleń urpaqtyń patriottyq sezimin nyǵaitý, salaýatty ómir saltyn nasihattaý, turǵylyqty jeri boiynsha buqaralyq sportty damytý jóninde halyqpen jumysty uiymdastyrý, sportshylardy meditsinalyq baqylaý úshin jaǵdai jasaý eskerilgen», - dedi Mádeniet jáne sport ministri.
