Májilis depýtat Serik Erýbaev «Aq jol» demokratiialyq partiiasynyń fraktsiiasy atynan jariialaǵan depýtattyq saýalynda elimizdiń avtobýs tasymaly salasyndaǵy kúrdeli jaǵdaidy kóterdi.
Osy oraida Premer-Ministriniń orynbasary Roman Skliardyń atyna saýal joldady, dep habarlaidy "Ult aqparat".
«Bul depýatattyq saýalǵa «Aq jol» demokratiialyq partiiasyna elimizdiń avtobýs tasymaly salasyndaǵy kásip ielerinenen kelip túsken kóptegen aryz-shaǵymdar túrtki boldy. Búkil álemde qoǵamdyq kólik shyǵyndy sala bolyp tabylatyny bárimizge belgili. Bul salaǵa memleket eriksiz shyǵyndardy jabý kepildigimen, jeke tasymaldaýshylardy tartady. Qazaqstanda turaqty qalalyq, qala mańyndaǵy jáne aýyldyq marshrýttarǵa qyzmet kórsetý kezinde kásiporyn shyǵyndaryn biýdjet qarajatynan sýbsidiialaý mindeti «Kólik týraly» jáne «Avtomobil kóligi týraly» zańdar, sondai-aq birqatar normativtik quqyqtyq aktilerdiń normalaryna sáikes, jergilikti atqarýshy organdarǵa júktelgen. Alaida, táýelsizdiktiń barlyq jyldarynda zańnama talaptary, jalǵyz-jarym erekshelikterdi qospaǵanda, bul salada tolyq oryndalmaǵan, sýbsidiialaý júzege asyrylmaǵan», - dedi depýtat Májilistiń jalpy otyrysynda.
Onyń aitýynsha, bul turǵyda turaqty avtobýs tasymaldary múshkil jaǵdaida, kópshilik jeke avtoparkter bankrotqa ushyraý aldynda tur.
«Joǵaryda atalǵan jáiitti túsine otyryp, Úkimet 2018 jyly «Avtobýs tasymaldaryn damytý jóninde keshendi baǵdarlama» qabyldady, onda tasymaldardy tolyq kólemde sýbsidiialaý, avtobýs parkin jańartý, elektrondyq biletteý júiesin engizý, zańsyz tasymaldaýshylarǵa qarsy kúres jónindegi sharalar qamtylǵan. Áleýmettik mańyzy bar salany sýbsidiialaý 2019 jyly ǵana bastaldy. 2020 jyldyń ózinde keibir oblystarda 2021-2023 jyldarǵa arnalǵan biýdjetti bekitý kezinde sýbsidiialaýǵa arnalǵan shyǵystar qarastyrylmaǵan», - dedi Serik Erýbaev.
Onyń sózine qaraǵanda, birqatar óńirlerde memlekettik organdar maqsatty túrde jeke avtoparkterdi yǵystyryp, «Shymkent Bas», «Aqjaiyq avtoparki» siiaqty kvazimemlekettik kásiporyndar qurýda.
Biraq mundai jaǵdaidyń ózinde de bul mekemelerdiń sharýashylyq qyzmetine aralasyp, sýbsidiialar tóleý jónindegi óz mindettemelerin oryndamai otyr.
«Osyǵan bailanysty «Aq jol» Demokratiialyq partiiasynyń fraktsiiasy avtobýs tasymalyndaǵy kúrdeli jaǵdaidy saýyqtyrý, sonyń ishinde jumys istep turǵan avtoparkterge tiesili sýbsidiialardy tóleý jóninde shuǵyl sharalardy qabyldaýdy suraidy», - dedi depýtat.
