Májiliste «QR-nyń keibir zańnamalyq aktilerine aýyldy eldi mekenderde internettiń qoljetimdiligin qamtamasyz etý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
«Aýyldy jerlerdi sapaly internetpen qamtamasyz etý – búgingi kúnniń basty talaby. Sebebi Memleket basshysy Qasym-Jomart Kemeluly Toqaev Ulttyq qoǵamdyq senim keńesiniń bilim jáne densaýlyq saqtaý salalaryn zamanǵa sai reformalaý týraly aitqan bolatyn. Osy jolda árine, tsifrlyq jáne elektrondy qyzmetterdiń qajettiligi óte mańyzdy. Sol úshin osy zań jobasyna engizilgen ózgerister aýyl turǵyndarynyń sapaly jáne qoljetimdi internetpen qamtamasyz etýge jańa serpin bereri sózsiz», - dedi Májilis tóraǵasy Nurlan Nyǵmatýlin.
Onyń aitýynsha bul zań aýyldy jerlerde internet jelilerin tartýdy jedeldetýge múmkindik beretinin atap ótti.
«Osynyń bári álbette aýyl halqyn zamanǵa sai telekommýnikatsiialyq jáne bailanys qyzmetimen qamtamasyz etýge jol ashady. Memleket basshysynyń tapsyrmasyn oryndaý úshin osy zań jobasy daiarlanyp otyr. Zańdy qabyldaý nátijesinde azamattar elektrondy memlekettik qyzmetti alýmen qatar, onlain-oqý, tsifrlyq densaýlyq saqtaý qyzmetteriniń múmkindikterin belsendi túrde qoldana alady. Aýyldardyń arasy alshaq jatqanyn bilesizder», - dedi ol.
Aita ketsek, zań jobasy aýyldyq eldi mekenderdi internetpen qamtamasyz etý maqsatynda ázirlengen. Ol Qazaqstan Respýblikasynyń 2 kodeksi men 2 zańyna ózgerister men tolyqtyrýlar engizýdi kózdeidi. Zań jobasy bailanys nysandaryn salý kezinde jer ýchaskelerin resimdeý boiynsha ruqsat berý rásimderin ońailatýǵa, bailanys operatorlarynyń barlyǵyna telekommýnikatsiialyq infraqurylymǵa teń qol jetkizý múmkindigin berýge baǵyttalǵan. Jumys tobyna depýtattar men komitetterdiń 28 usynysy kelip túsip, olar múddeli ministrlikter, vedomstvolar jáne qoǵamdyq uiymdar ókilderiniń qatysýymen jumys tobynyń eki otyrysynda, komitettiń keńeitilgen otyrysynda talqylanǵan.
