Májilistiń jalpy otyrysynda depýtat Dinara Zákieva ataýly áleýmettik kómek kólemin arttyrýdy surady, dep habarlaidy QazAqparat.
«Atap aitqanda, otbasylardyń jaǵdaiy birdei emes, bir jerde ata-ana balalaryn barlyq qajettiliktermen qamtamasyz ete alsa, endi bir jerde ondai múmkindik joq. Keminde 625 myń, demek árbir onynshy bala az qamtylǵan otbasynda turyp jatyr. Bundai otbasyny qoldaýdyń bir túri - ataýly áleýmettik kómek (AÁK). Alaida onyń mólsheri tipti qarapaiym qajettilikterdi qamtamasyz etýge jetpeidi. Mysaly, jan basyna shaqqandaǵy tabysy kedeilik sheginen tómen 6 adamnan turatyn otbasyna beriletin AÁK 7 myń teńgedei ǵana», - dedi D. Zákieva Úkimet basshysynyń orynbasary Eraly Toǵjanovtyń atyna joldaǵan saýalynda.
Onyń aitýynsha, kómekke muqtaj balany nemese otbasyn ózdiginen anyqtap, kómek kórsetýdiń ornyna, jumys tek kelip túsken ótinishpen júrgizilip jatyr. Memlekettik baǵdarlamalar týraly múldem estimegen, qandai quqyqtarynyń bar ekendigin bilmeitin, qujattary joq bolǵan soń qarapaiym qyzmetter men kómek túrlerin ala almai júrgen 200-den astam otbasy anyqtaldy.
«Eshqashan mektepke barmaǵan 10-13 jastaǵy balalardy, aýrýlary baryna qaramastan, týǵannan beri eshqandai meditsinalyq tekserýden ótpegen balalardy kórdik. Bul otbasylar týraly ýchaskelik qyzmetter ákimdikterdi habardar etse de, olar adam shoshyrlyq jaǵdaida ómir súrýlerin jalǵastyrǵan. Búginde 1 mln 145 myń otbasy daǵdarys jaǵdaiynda, al qolaisyz jaǵdaida dep esepte turǵan otbasylarda 12 myń bala tárbielenip jatyr. Nátijesinde, áleýmettik máselelerdiń sheshilmeýi kóbinese bala quqyqtarynyń buzylýy men qaiǵyly saldarlarǵa, iaǵni balalar úiine túsýine jáne zorlyq-zombylyqqa ákep soǵady», - dedi depýtat.
«Munyń sebebi nede? Fýnktsionaldyq taldaýymyz kórsetkendei, otbasy jáne bala quqyqtaryn buzýdyń aldyn alý máseleleri nemquraily, ári sońǵy kezekte qaralyp júr. Kámeletke tolmaǵandardyń isteri jónindegi komissiianyń jumysy kóp jaǵdaida tek formaldy túrde ǵana. Komissiia músheleriniń jumystyń kóptiginen otbasylarǵa baratyn ýaqyty joq. Al úilestirý men baqylaý qyzmeti bir ǵana hatshyǵa júktelgen», - dedi ol.
Búgingi tańda ókiletti organdar Balalar jylyna arnalǵan is-sharalar josparyn ázirleýde. Oǵan depýtattar kelesi tarmaqtardy qosýdy usynady:
1. Turmysy tómen otbasylardyń balalaryn qoldaýdyń tiimdiligin arttyrý úshin AÁK-ti ár balaǵa kúnkóris minimýmyna deiin arttyrý. Iaǵni 1 balaǵa 36 myń teńge. Bul úshin qosymsha 225 mlrd teńge kerek.
2. Eldi mekenderde otbasyna keshendi túrde kómektesý jáne bala quqyqtary buzylýynyń aldyn alý jónindegi ókiletti organdar arasynda jumysty úilestirip otyratyn jáne tiimdi ózara is-qimyldy qamtamasyz etetin Otbasy, jastar jáne balalar isteri jónindegi derbes basqarma qurý.
3. Strategiialyq qujattarda kórsetilgen otbasy institýtyn nyǵaitý, otbasylyq qolaisyzdyqtyń, turmystyq zorlyq-zombylyqtyń jáne balalarǵa qatygez qaraýdyń aldyn alý jónindegi nysanaly indikatorlardy óńirlerdiń Aýmaqty damytý josparlaryna engizý.
