Májilis depýtaty Qazybek Isa elimizdiń túkpir-túkpirindegi Alash ustanymyn nasihattaǵan, sol úshin qurban bolǵan jergilikti Alash qozǵalysy qairatkerleriniń esimderi áli de belgisiz bolyp otyrǵanyn aitty, dep habarlaidy "Ult aqparat".
Biyl 30 jyldyǵy atalyp ótetin Qazaq Eli Táýelsizdigi jolyndaǵy ǵasyrlar boiǵy janqiiarlyq kúrestiń ishinde Alashordanyń orny airyqsha! Basty Urany - Jerdi satpaý, Tildi saqtaý bolǵan Alash arystaryn ulyqtaýdy QR Prezidenti Toqaev «Táýelsizdik bárinen qymbat» atty maqalasynda bastap berdi: «Biz kezinde elge qyzmet etýdiń ozyq úlgisin kórsetken Alash qairatkerlerinen taǵylym alamyz... Táýelsizdigimizdiń mereitoiy aiasynda osyndai birtýar tulǵalardy eske alyp, olardyń murasyn jastarymyzǵa jáne búkil álemge pash etýimiz kerek» – dep, atap kórsetti. Alaida, Alash dese qarapaiym kópshiliktiń esine tek Alashorda úkimetiniń kórnekti kósemderi Álihan Bókeihan, Ahmet Baitursynuly, Mirjaqyp Dýlatuly sekildi birneshe tulǵanyń esimi keledi. Shyn máninde bul tizim áldeqaida aýqymdy», - dedi Q. Isa Parlament Májilisiniń jalpy otyrysynda Premer-Ministriniń orynbasary Eraly Toǵjanovtyń atyna joldaǵan depýtattyq saýalynda.
Onyń aitýynsha, elimizdiń túkpir-túkpirindegi Alash ustanymyn nasihattaǵan, sol úshin qurban bolǵan jergilikti Alash qozǵalysy qairatkerleriniń erlikteri eskerilmei, esimderi álige deiin belgisiz bolyp otyrǵany ókinishti. Bulardyń bári Táýelsiz Qazaq Eli úshin qurban bolǵandar!
«Sol sebepten, 2019 jyly «Aq jol» partiiasynyń tóraǵasy «Alash» mádeniet jáne rýhani damý institýtymen birigip, buryn belgisiz bolyp kelgen 700-den astam tulǵany quraityn jergilikti Alash qairatkerleriniń tizimin daiyndady. Alashtanýshy ǵalymdardyń zertteýleriniń negizinde jasalǵan tizimge kópshilik qaýymǵa esimderi umyt bolǵan ár óńirdiń jergilikti Alash qairatkerleri engizildi. Árbir oblys, qala ákimderine sol jerge qatysy bar, sol jerden shyqqan Alashshyl azamattardyń tizimi jiberilip, olardyń attaryń jergilikti jerdegi kóshe, mektep, t.b. nysandar ataýlaryna qoldanýdy usynǵan bolatynbyz. Alaida, alynǵan jaýaptar kóńilge qonbaidy. Kóbinese jaýaptar jaltarma sipatta, buǵan deiin Alashtyń el aýzyndaǵy jiyrma shaqty tanymal basshylarynyń esimderiniń ataýmen shektelgen», - dedi depýtat.
«Sol sebepten, «Aq jol» partiiasy, Táýelsizdigimizdiń 30 jyldyq mereitoiynyń qarsańynda, Alash qairatkerleriniń esimderin onomastika turǵysynda qoldanýdy jón sanap, atalǵan tizimdi Úkimetke jiberip otyrmyz. Osyǵan bailanysty, «Aq jol» QDP fraktsiiasynyń depýtattary, 2019 jyly biz joldaǵan hattardy jergilikti ákimdikterge qaita kóterýdi tapsyryp, myńdaǵan Alash arystarynyń qasietti esimderin jergilikti jerde ulyqtaý sharalaryn baqylaýǵa alýyńyzdy suraidy», - dedi Qazybek Isa.
