Parlament Májilisiniń depýtaty Nurjan Áltaev tótenshe jaǵdaiǵa bailanysty aýyl sharýashylyǵy ónimderin ótkize almai otyrǵan fermerlerdiń máselesin kóterip, Úkimet basshysyna depýtattyq saýal joldady, dep habarlaidy QazAqparat.
«Qazaqstanda tótenshe jaǵdaidyń engizilýine bailanysty agroónerkásip kesheni sýbektileriniń qozǵalysy, tehnikalar men aýyl sharýashylyǵy jumysshylarynyń dislokatsiiasy, aýyl sharýashylyǵy taýarlaryn tasymaldaý men satýda edáýir qiyndyq týyndap tur. Qazaqstan Prezidentiniń Tótenshe jaǵdai engizýge bailanysty Jarlyǵyna sáikes keibir aimaqta adamdar men jeke kólikterdiń, júk kólikteri men taýarlardyń qozǵalysyna shekteý engizilgen. Sonymen qatar Aýyl sharýashylyǵy ministriniń jeke buiryǵyna sáikes 2020 jyldyń 2 sáýirinde aýyl sharýashylyǵy taýarlarynyń keibir túrin syrtqa shyǵarýǵa jáne shyǵarýdy shekteý tártibi kúshine engen», - dedi Nurjan Áltaev Parlament Májilisiniń jalpy otyrysynda.
Depýtattyń aitýyna qaraǵanda adamdardyń, aimaqtarda aýyl sharýashylyǵy tehnikalarynyń qozǵalysyna, taýarlardy tasymaldaý men satýǵa ruqsat alý tártibiniń ashyq protsedýrasy joq. Osynyń saldarynan jergilikti atqarýshy jáne quqyq qorǵaýshy organdar júk tasymalyn ótkizý tártibin ózinshe túsinip, keibir jerde shekten shyqqan áreketter bolyp jatyr.
«Máselen Jambyl men Almaty oblysynyń shekarasynda aýyl sharýashylyǵy ónimi tielgen fýralar blokposttarda táýlik boiy tur. Olardyń kózdegen orynǵa tez ári kedergisiz jetý múmkindigi qarastyrylmaǵan. Qyrǵyz Respýblikasymen shekarada da eksportqa shyǵaratyn ónimderdi tiegen kólikterdiń keptelisi paida bolǵan. Al aýyl sharýashylyǵy ónimderin ornyna tez jetkizbese buzylyp ketedi. Onyń ústine sarymsaq, qyryqqabat, sábizdi eksportqa shyǵarýdy toqtatyp tastaýdyń ózi oi týyndatady. Qazir ońtústik aimaqtarda tez buzylyp ketetin 800 myń tonnaǵa jýyq aýyl sharýashylyǵy ónimi jinalyp qalǵan. Qazaqstanda ol ónimderdi tutyný deńgeii 10 ese az. Iaǵni, ónim kerekti mólsherden artyq óndirilgen. Qazaqstannyń ońtústigindegi fermerler el ishinde suranystyń bolmaýynan buzylǵan ónimdi laqtyrýǵa májbúr», - deidi ol.
Sol sebepti depýtat Úkimetten adamdar men taýarlardyń qozǵalysyn retteitin biryńǵai tártip engizýdi, maquldaý tártibiniń bárin onlain rejimge aýystyrýdy, tez buzylatyn aýyl sharýashylyǵy ónimderin kirgizýge qoiylǵan shekteýlerdi alyp tastaýdy, blokposttarda júk kólikteri úshin jeke dáliz engizýdi surap otyr.
