Májilis «Qazaqstan Respýblikasynyń keibir zańnamalyq aktilerine jer qatynastary máseleleri boiynsha ózgerister men tolyqtyrýlar engizý týraly» QR Zań jobasyna QR Parlamentiniń Senaty engizgen ózgeristermen jáne tolyqtyrýlarmen kelisti, dep habarlaidy "Ult aqparat".
Parlament jerdi sheteldikterge satpaýdy kózdeitin zań jobasyn qabyldady.
«Agrarlyq máseleler komiteti «Qazaqstan Respýblikasynyń keibir zańnamalyq aktilerine jer qatynastary máseleleri boiynsha ózgerister men tolyqtyrýlar engizý týraly» QR Zań jobasyna QR Parlamenti Senaty engizgen ózgeris pen tolyqtyrýdy qarap shyqty. Senat usynǵan ózgerister men tolyqtyrýlar sheteldik jer paidalanýshylardyń jáne sheteldik qatysýy bar zańdy tulǵalardyń, sondai-aq aýyl sharýashylyǵy maqsatyndaǵy jer ýchaskelerin jeke menshik jáne jer paidalaný quqyǵymen kandastardyń ielenýine tyiym salýdy engizýdi kózdeitin zań jobasynyń Májilis maquldaǵan tujyrymdamasyn buzbaidy jáne onyń mazmunyn nasharlatpaidy. Baiandalǵandy eskere otyryp, Agrarlyq máseleler komiteti atalǵan Zań jobasyna QR Parlamenti Senaty engizgen ózgerispen jáne tolyqtyrýmen kelisýdi usynady», - dedi Agrarlyq máseleler komitetiniń hatshysy Berik Ospanov Májilistiń jalpy otyrysynda.
29 sáýir kúni Senat «Qazaqstan Respýblikasynyń keibir zańnamalyq aktilerine jer qatynastary máseleleri boiynsha ózgerister men tolyqtyrýlar engizý týraly» zań jobasyn Májiliske qaitarǵan edi.
Usynylǵan zań jobasynda aýyl sharýashylyǵy jerlerin sheteldikterge jáne sheteldik kompaniialarǵa, sheteldik úlesi bar qazaqstandyq kompaniialarǵa, azamattyǵy joq adamdarǵa, halyqaralyq qatysý úlesi bar ǵylymi ortalyqtarǵa, sondai-aq qandastarǵa berýge tolyqtai tyiym salý kózdelgen.
Odan bólek, Zań jobasynda budan buryn sheteldikter jáne sheteldik úlesi bar qazaqstandyq kompaniialar jalǵa alǵan aýyl sharýashylyǵy jerlerin paidalaný merzimi uzartylmaityny jáne olar paidalaný merzimi aiaqtalǵanǵa deiin ǵana ielikte bolatyny kózdelgen.
