Parlament Májilisiniń jalpy otyrysynda «Qazaqstan Respýblikasynyń atqarýshylyq is júrgizý máseleleri boiynsha keibir zańnamalyq aktilerine ózgertýler men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat tilshisi.
«Elbasy Nursultan Nazarbaev «100 naqty qadam» - Ult josparynyń 27 qadamynda jeke sot oryndaýshylary institýtyn damytyp, memlekettik sot oryndaýshylaryn birtindep qysqartýdy tapsyrdy. Usynylyp otyrǵan zań jobasy osy tapsyrma boiynsha qabyldanǵan sharalardy ári qarai jetildirý maqsatynda ázirlendi. Ony daiyndaý barysynda jeke sot sheshimderin oryndaý tájiribesi zerdelenip, zańnamadaǵy olqylyqtar eskerildi. Sonymen qatar, Ekonomikalyq yntymaqtastyq jáne damý uiymy men TMD elderi tájiribesi qarastyryldy», - dedi Májilis depýtaty Asylbek Smaǵulov zań jobasyn tanystyrý barysynda.
Onyń paiymynsha, jalpy atqarýshylyq is júrgizý sapaly bolsa, azamattardyń sotqa degen senimi de artady.
«Árine, bul salada problemalar bar. Olar depýtattardyń qatysýymen ótken sharalarda keńinen talqylandy. Negizgi problemalarǵa toqtalsaq, shalǵai eldi mekender jeke sot oryndaýshysymen tolyqtai qamtylmaǵan. Ekinshiden, atqarýshylyq is júrgizý satysynda azamattardyń quqyqtary osal qorǵalǵan. Úshinshiden, jeke sot oryndaýshylaryn baqylaý, olardy zań buzýshylyqtary úshin jaýapkershilikke tartý sharalary jetilmegen», - dedi depýtat.
Atalǵan zań jobasynyń maqsaty - barlyq taraptardyń múddelerin eskere otyryp, atqarý qujattaryn sapaly ári ýaqtyly oryndaýdy qamtamasyz etý.
Zań jobasyn qabyldaý mynandai mindetterdi sheshýge múmkindik beredi: jeke sot oryndaýshylarynyń qyzmetin jetildirý jáne atqarýshylyq is júrgizýdiń tiimdiligin, iaǵni sot oryndaýshysy qabyldaityn protsestik qujattardy, áreketterdi ońtailandyrý arqyly arttyrý; jeke sot oryndaýshylarynyń tártiptik praktikasyn jetildirý; memlekettik eńbek inspektorlary jumys berýshilerdiń jalaqy tólemeý máseleleri boiynsha bergen uiǵarymdardyń tiimdi oryndalýyn qamtamasyz etý.
