Parlament Májilisiniń jalpy otyrysynda «Qazaqstan Respýblikasyndaǵy sailaý týraly» Qazaqstan Respýblikasynyń Konstitýtsiialyq zańyna tolyqtyrýlar engizý týraly» Konstitýtsiialyq zańynyń jobasy maquldandy, dep habarlaidy QazAqparat.
«Qazaqstan Respýblikasyndaǵy sailaý týraly» Konstitýtsiialyq zańyna tolyqtyrýlar engizý týraly» Konstitýtsiialyq zańynyń jobasy Prezidenttiń Ulttyq qoǵamdyq senim keńesiniń ekinshi otyrysynda bergen tapsyrmasyn iske asyrý maqsatynda ázirlendi.
Zań jobasymen partiialyq sailaý tizimderinde áielder men jastar úshin 30 paiyz kvotany qarastyrý usynylady. Osy maqsatta, Sailaý týraly Konstitýtsiialyq zańda áielder men jastarǵa arnalǵan kvotalardy partiialyq tizimge engizý týraly talap qoiylatyn bolady», - dedi Ádilet ministri Marat Beketaev.
Onyń sózine qaraǵanda, búgingi tańda álemdegi memleketterdiń basym bóligi áielder men jastardyń sailaý protsesine teń qoljetimdiligine kepildik berý úshin qajetti sharalar qabyldaýda. Partiialyq genderlik kvotalar Eýropa elderinde qoldanylady jáne osyndai erejeler Germaniia, Norvegiia, Frantsiia jáne Belgiiada keńinen taralyp, olar sailaý týraly zań deńgeiinde bekitilgen.
«Osyǵan orai, halyqaralyq tájiribe aiasynda usynylyp otyrǵan jańa normalar áielderdi eldiń qoǵamdyq-saiasi protsesterine belsendi tartýǵa múmkindik beredi. Sonymen qatar, Memleket basshysy atap ótkendei, biz jastardyń Parlamentke jáne jergilikti ókiletti organdaryna kelýine yqpal etýge tiispiz. Osy bóliktegi zańnamalyq túzetýler, qoǵamdyq-áleýmettik problemalardy sheshý úshin qabiletti jastardy da saiasatqa belsendi tartýǵa múmkindik beretin bolady», - dedi ministr.
